د کلیو، بیارغونې او پراختیا وزارت د هلمند په مرکز او څلورو ولسوالیو کې د اوبو رسولو د یوې پروژې د بشپړولو خبر ورکوي. دغه وزارت ویلي چې د آی.آر.سي. موسسې په مالي مرسته د هلمند په مرکز لښکرګاه سربېره، سنګین، موسی قلعه، نادعلي او مارجه ولسواليو کې د اوبو رسولو د یوې پروژې چارې چې په کې د څښاک پاکو اوبو د ۱۸ نویو ژورو څاه ګانو کیندل او د ۴۴ پخواني ژورو څاه ګانو بیا رغول شامل دي، بشپړې او ګټې اخیستنې ته وسپارل شوه. د دغه وزارت د معلوماتو له مخې؛ د یادې پروژې په بشپړېدو سره د مرکز او نوموړو ولسوالیو ۳۱۴۸ کورنيو، ۲۷ جوماتونو او ۲ مدرسو د څښاک پاکو اوبو ته لاسرسی پيدا کړی دی.
