د افغانستان او پاکستان د سوداګرۍ ګډه خونه وايي، د پاکستان په کراچۍ بندر کې د افغان سوداګرو د پاتې سلګونو کانټینرونو لېږد ته اجازې ترلاسه کولو په هڅه بوخت دي. ویل کېږي، شا و خوا درې نیم زره کانټینرونو ته د لېږد اجازه ورکړل شوې او ټول افغانستان ته په رسېدو دي. د دې خونې مسوول خان جان الکوزي ویلي، څه کم ۵۰۰ کانټینرونه لا هم په کراچۍ کې ایسار پاتې دي. پاکستان د اکټوبر په درېیمه له افغانستان سره د ټرانزیټ په برخه کې په سوداګریز تړون کې بدلونونه راوستل او د افغان سوداګرو پر وارداتي توکو لس سلنه تعرفې سربېره یې د ۲۲۰ قلمه توکو پر لېږد بندیز ولګاوه، هغه څه چې افغان لوري ته د منلو وړ نه وو. له دې کبله سلګونه کانټینرونه په کراچۍ کې ایسار پاتې شول.
