عباد: د ډاکټرانو او مسلکي کسانو د معاشونو لوړولو هڅې روانې دي

د عامې روغتیا سرپرست وزیر د کابل د تخصصي روغتونونو له ټریني متخصصینو او سرطبيبانو سره کتلي دي. په دې کتنه کې، ټریني متخصصینو د معاشونو د زیاتوالي، په روغتونونو کې د مسلکي کسانو د ګمارنې او نورو اړینو موضوعاتو په اړه خپلې ستونزې او وړاندیزونه شریک کړي او د عامې روغتیا وزارت له مشرتابه څخه يې د همکارۍ غوښتنه کړې ده. په ورته وخت کې د عامې روغتیا سرپرست وزیر ویلي، چې په روغتونونو کې د ټریني متخصصینو، ډاکټرانو او نورو مسلکي کارکوونکو د معاشونو د زیاتوالي اړوند هڅې روانې دي. عباد همدارنګه په روغتونونو کې د مسلکي کسانو په ګمارنې ټینګار کړی او زیاته کړې يې ده، چې هڅه کوي؛ تر څو په روغتونونو کې د غوره او معیاري روغتیايي خدمتونو د وړاندې کولو په موخه پوه او مسلکي کسان پر دندو وګمارو.