د جلال اباد ښاروالۍ روان کال ۱۸ لویې پروژې پلې کړې دي

د جلال اباد ښاروالۍ مسوولنیو په یوه خبري غونډه کې د روان کال لاسته راوړنې او د خپلو راتلونکو پلانونو په تړاو معلومات له رسنیو سره شریک کړل. د یادې ښاروالۍ ویاند بختي جان مراد وايي، سږ کال د جلال اباد ښاروالۍ له لوري د ۳۶۰ میلیونه افغانیو په لګښت ۱۸ بېلابېلې لویې پروژې پلي شوې، چې سلګونه تنو ته په کې کاري بوختیاوې هم برابرې شوې وې. بختي جان زياته کړه، د ۵۷ لکه ډالرو په لګښت ۵۸ نورې وړې پروژې شته چې د ملګرو ملتونو د پروژوې خدمتونو دفتر او نړيوال بانک یې ملاتړ کوي. د نوموړي په خبر، د دغو پروژو یو شمېر یې پلې شوې او پر ځینو کار روان دی چې زرګونه کسانو ته په کې د کار زمینه برابره شوې ده.