اوچا: ۲۱ میلیونه افغانان د څښاک پاکو اوبو ته لاسرسی نه لري

د ملګرو ملتونو د بشري چارو د همغږۍ اداره یا اوچا وايي، اوسمهال په افغانستان کې ۲۱ میلیونه وګړي د څښاک پاکو اوبو ته لاسرسی نه لري. اوچا ویلي، چې په افغانستان کې د اقلیم د بدلون یو له ښکاره اغیزو څخه د څښاک د اوبو کمښت دی. د اوچا په وينا، د افغانستان په ٣٠ ولايتونو کې د څښاک د اوبو کيفيت ډېر ټيټ دى او ډېرى خلک د بېلابېلو ناروغيو له ګواښ سره مخ دي. د روان کال په لومړیو کې د ملګرو ملتونو د ماشومانو صندوق ویلي وو چې په افغانستان کې د اوږدې وچکالۍ له امله د افغانستان د اوبو ۴۲ سلنه زېرمې وچې شوې چې له امله یې خلک د څښاک د پاکو اوبو له سخت کمښت سره مخ شوي دي.