ایراني چارواکي:موږ په برید کې کوم پاکستانی نه و په نښه کړی

د ایران د بهرنیو چارو وزیر پرون د سویس په داووس کې د نړیوالې اقتصادي غونډې په څنډه کې ویلي، چې ایراني ځواکونو په پاکستان کوم پاکستانی نه؛ بلکې یوه ایرانۍ سخت دریځه ډله یې په نښه کړې وه. ایراني چارواکو ویلي، دوی هغه سخت دریځه ډله، چې  په دې وروستیو کې یې په ایران کې د څو بریدونو مسوولیت اخیستی، په نښه کړې او د هغې دوه مرکزونه یې له منځه وړي دي. بلخوا اسلام آباد دغه برید پرخپل هوایي قلمرو ښکاره تېری بللی دی او په غبرګون کې یې له ایرانه خپل سفیر ورغوښتی او په اسلام آباد کې یې هم د ایران سفیر ته چې د دغه برید په مهال تهران کې و، د بیا نه ورتلو خبر ورکړی دی. ایران د سې شنبې په ورځ د پاکستان پر بلوچستان ایالت د توغندیو او بې پيلوټه الوتکې بریدونه وکړل چې د راپورونو له مخې دوه ماشومان په کې وژل شوي دي.