روسیه وایي چې تر راتلونکو دوو میاشتو به په پراخه پیمانه د کرونا ضد واکسینو ویش پیل کړي. د روسیې روغتیايي چارواکو ویلي چې د روانې میاشتې په پای کې به د واکسینو بیا ارزونه هم وشي او په بله میاشت کې به یې وېش پیل شي. ددوی په خبره د واکسینو ویش لومړی له ډاکټرانو او معلمانو پيلوي. روسي چارواکي وایي چې ددوی په څېړنیزو مرکزونو کې ددغه واکسین د ازمویلو پایلې مثبتې دي او تمه لري چې ژر یې وېش پیل شي. بلخوا د روغتیا نړیوال سازمان بیا د روسیې له لوري د واکسینو پر دومره چټک وېش اندېښنه ښييي او په خبره یې دغه واکسین باید لومړی په دقیقه توګه وارزول شي. برېتانیا، امریکا او روسیه هغه هېوادونه دي چې د کرونا ویروس ضد واکسینو د جوړولو ادعا یې کړې ده او په خبره یې پایلې یې مثبتې دي.
