پکتیا کې د موسمي ناروغیو له امله د ماشومانو مړینه زیاته شوې

د پکتیا ولایت د ولایتي حوزوي روغتون مسوولینو خبر ورکړی، چې د موسمي ناروغیو له امله هره میاشت شاوخوا ۲۰ ماشومان ژوند له لاسه ورکوي. د یاد ولایت روغتیايي مسوولینو هلته په ولایتي روغتون کې د ماشومانو د مړینې ستر لامل د ناروغانو زیاتوالی بللی او ویلي یې دي چې د مراجعینو په زیاتوالي سره ماشومانو ته رسېدنه سخته شوې ده. د پکتیا ولایتي روغتون مسوولینو همداراز ویلي چې په یاد روغتون کې د ماشومانو د مړینې کچه په تېرو څو میاشتو کې د پام وړ زیاته شوې ده. د یادولو وړ ده، چې په دې وروستیو کې د پکتیا ولایت سربېره په یو شمېر نورو ولایتونو کې هم د سینه‌ بغل او نورو موسمي ناروغیو له امله د ماشومانو د مړینې راپورونه زیات شوي دي.