هېواد کې د پنبې حاصلات ۴۱ سلنه زیات شوي

د کرنې اوبو لګولو او مالدارۍ وزارت وایي، د دې وزارت د احصايې او معلوماتو ریاست د شمېرو له مخې سږ کال په هېواد کې ۱۲۲زره ۴۵۵مټریک ټنه پنبه تولید شوې، چې د تېر کال په پرتله ۴۱ سلنه زیاتوالی ښيي. د کرنې وزارت په دې اړه په خپره کړې خبرپاڼه کې ویلي، سږ کال په ټول هېواد کې ۹۳ زره ۶۳۰ هکتاره ځمکه پنبه کرل شوې وه، چې د معلوماتو له مخې ټولیز حاصلات یې ۱۲۲ زره او ۴۵۵ مټریک ټنو ته رسېدلي دي. د دغه وزارت په خپرپاڼه کې ویل شوي، چې هلمند، بلخ، تخار، ننګرهار او کندهار هغه ولایتونه دي چې د هېواد په کچه د پنبې ډېره کرکېله پکې کېږي، چې له دې ډلې یې هلمند یو له هغو ولایتونو دې چې سږ کال پکې په ۴۹ زره او ۷۵ هکتاره ځمکه پنبه کرل شوې وه او ۶۹ زره ۶۸۷ مټریک ټنه حاصلات ترې راټول شوي دي.