د هېواد په صادراتو کې ۶۰ سلنه کموالی راغلی دی

د سوداګرۍ او پانګونې خونې مسوولین وايي، د هېواد په صادراتو کې ۶۰ سلنه کموالی راغلی او د صادراتو له روان حالت نه اندېښمن دي. افغان سوداګر هم تر یوه بریده په سوداګریز بهیر د کرونا منفي تاثیرات مني، خو زیاتوي چې د صنعت او سوداګرۍ وزارت لا هم نه دی توانېدلی، چې ګاونډیو هېوادونو سره هغه ستونزې حل کړي، چې لا تر اوسه ورسره افغان صادرات له ستونزو سره مخ دي. د صنعت اوسوداګرۍ وزارت مسوولین وايي، چې د کرونا له امله نړیوالو مارکېټونو ته د افغان صادراتو د بیا پیل هڅې روانې دي. دوی زیاتوي چې تر اوسه یې نږدې ۲۰ زره میټریک ټنه صادرات تر سره کړي او هیله څرګندوي، چې د مالي کال په وروستیو دوو ربعو کې به دا کچه نوره هم لوړه شي. د اقتصادي چارو کارپوهان بیا هم د سوداګرۍ له وزارت نه غوښتنه کوي، چې باید د صادراتو د پراختیا لپاره زیاتې هڅې وکړي.