د نیمروز امنیتي مسوولین وایي چې د دغه ولایت په دلارام ولسوالۍ کې د نشه يي توکو د تولید یوه کارخونه کشف او له منځه وړل شوې ده. د دلارام ولسوالۍ د امنیې قومندان محمد ابراهیم هېواد وايي، چې د دغه ولسوالۍ په دهمزنګ سیمه کې د یو لړ کشفي عملیاتو په ترڅ کې د نشه يي توکو د تولید یوه کارخونه کشف او له منځه وړل شوې ده. هغه زیاته کړه چې له یادې کارخونې ۸۵ کیلو ګرامه اېف ډوله نشه يي توکي، ۳۵ کیلو ګرامه پوډر، ۱۲ ډبې ستون، او د نشه يي توکو د جوړولو لپاره اړوند توکي لاسته راغلي و چې د مسوولینو په شتون کې وسوځول شول.
