د راپورونو له مخې دغه ښوونځي ته تېره شپه اور ورته شوی دی. د فاریاب د پولیسو چارواکي وایي ښوونځی د خواجه سبزپوش ولسوالۍ په بادغیسي کلي کې دی چې په ۱۳۵۷هـ کال کې جوړ شوی و. د فاریاب والي نقیب الله فایق بیا وایي چې ښوونځی د طالبانو له لوري سوځول شوی دی. دده په خبره دغه ښوونځي ۱۶ درسي خونې لرلې چې ټول ټال ۷۵۰ زده کوونکو پکې زده کړې کولې خو د وسله والو طالبانو له لوري سوځول شوی دی. هغه وایي طالبانو یو ځل بیا له زده کړو سره خپل مخالفت پیل کړی دی او د ښوونځیو سېځلو ته یې مخه کړې ده. طالبانو تر اوسه د یاد حکومتي چارواکي ددغه ادعا په اړه څه نه دي ویلي.
