په بلخ ولایت کې د اوړو د تولیدوونکو اتحادیې د ګمرکي تعرفو او مالیاتو د کمولو غوښتنه کوي. د دې اتحادیې غړي وايي، چې په دې برخه کې د ځان بسیاینې لپاره باید د حکومت لخوا ملاتړي پروګرامونه پيل شي. د شمېرو له مخې اوسمهال په هېواد کې د اوړو د تولید شاوخوا ۲۰۰ شرکتونه شته، چې څه باندې ۶۰۰ میلیونه ډالرو پانګونې پرې شوې ده، خو زیاتره دغه شرکتونه د اومه موادو د بیو د لوړوالي له امله له کاره لوېدلي دي. سیمه ییز چارواکي وايي، د اوړو د تولیدوونکو د ستونزو هواري ته ژمن دي. د دغه اتحادیې د معلوماتو له مخې په افغانستان کې د اوړو کلنۍ مصرف شاوخوا اووه میلیونه اټکل شوی او تولیدي شرکتونه په کال کې د پنځو میلیونو ټنو د تولید وړتیا لري.
