د کډوالو او بېرته راستنېدونکو چارو وزارت وایي، چې په تېرو دوو ورځو کې د تورخم او سپین بولدک له لارې ۷۱۲ تنه افغان کډوال په جبري توګه له پاکستانه څخه هېواد ته راستانه شوي. له بلېخوا تېره ورځ نږدې دوه زره ایران میشتي افغان کډوال هم په جبري توګه او خپله خوښه د هرات د اسلام کلا له لارې له ایران څخه هېواد ته راستانه شوي. د یادوزارت په وینا؛ یو شمېر راستنو شویو هېوادوالو سره نغدي مرستې شوې او یو شمېر نور یې د لا زیاتو مرستو ترلاسه کولو په موخه د ملګرو ملتونو عالي کمېشنرۍ او د کډوالۍ نړیوال سازمان دفترونو ته ور وپېژندل شوي دي.
