د کډوالو لپاره د ملګرو ملتونو عالي کمېشنري وایي، د افغانستان په بېلابېلو ولایتونو کې ناڅاپي سېلابونو خلک له هره اړخه سخت ځپلي دي. دغه بنسټ ویلي، چې په دغه ناورین کې مېرمنې او ماشومان تر نورو زیات ځپل شوي او له سېلاب ځپلو سره یې په هر اړخیزو مرستو او ملاتړ ټینګار کړی. د ملګرو ملتونو عالي کمېشنري وايي، مرګونو سېلابونو تېره میاشت لږ تر لږه ۳۴۷ تنه وژلي او له ۱۰ زرو څخه زیات کورونه یې ویجاړ کړي دي. دغو سېلابونو د مرګ ژوبلې تر څنګ زرګونه کورنۍ بې کوره کړې، کرنیزې ځمکې او بنسټیزې پروژې یې د لارو سړکونو په ګډون پلونه، پلچکونه، روغتیایي تاسیسات او د ښوونځيو ودانۍ زیانمنې کړې دي. غور د هغو ولایتونو په ډله کې دی، چې وروستیو سېلابونو ډېر زیانمن کړی دی. ملګري ملتونه وايي، د مېرمنو تر څنګ ماشومان هم له سختو ګواښونو سره مخامخ دي.
