د اروپايي ټولنې غړو هېوادونو د اکتوبر په ۴مې نېټې د رایګیرۍ له لارې يوه مسوده تصویب کړې، چې له مخې به یې د چین پر برېښنايي موټرونو ګمرکي تعرفې لوړوي.
د اروپايي ټولنې غړو هېوادونو دغې مسودې ته ۱۰ موافقې، ۱۲ ممتنعې او جرمني، هنګري، ملتا، سلواکيا او سلاونیا مخالفې رایې ورکړې دي.
د چین سوداګرۍ وزیر وانګ ون تاو څه موده وړاندې اروپا ته په سفر تللی و او له اروپايي چارواکو سره يې د ګمرکي تعرفو پر يادې موضوع خبرې کړې وي.
اروپايي مشرانو نوموړي ته ډاډ ورکړی و، چې له چين سره د خبرو اترو نیت لري او حتی دا یې هم ورته ويلي وو، که دوی وروستۍ پرېکړه هم وکړي، نو بیا به هم له چين سره خبرو ته دوام ورکوي.
چین د هرې موضوع د هواري لپاره مشورې او خبرې غوره بولي او غواړي له اروپا سره پر یو لوري ګامونه پورته کړي، خو که د اروپا سیاسي غوښتنه یوازې جنجالي بڼه ولري او د يادې موضوع د هواري لپاره عملي کوښښونه ونه کړي، نو د دواړو خواوو خبرې اترې به له ستونزو سره مخ شي.
له هغه وروسته چې اروپايي کمېسیون د برېښنايي موټرو له صنعت سره د چين د حکومت د سبسایډۍ پرضد پلټنه پيل کړې، د چین د ماشینرۍ او برېښنايي تولیداتو د وارداتو او صادراتو سوداګریزې ټولنې د دغه هېواد د برېښنايي موټرو د صنعت د استازي په توګه دنده پيل کړې او مسئولین يې څو ځلې د ګواهۍ اورېدو غونډو کې د ګډون لپاره اروپا ته تللي او د اروپايي ټولنې د غړو هېوادونو له حکومتي او مسلکي شخصیتونو سره یې د نظریو تبادلې کړې دي.
د یادې ټولنې يو مسئول خبریالانو ته ویلي، چې د اروپايي ټولنې ځینو غړو هېوادونو د چین پر برېښنايي موټرونو د ګمرکي تعرفو له لوړولو سره هوکړه کړې او موخه یې دا ده، چې پر چیني تصدیو فشارونه زيات کړي او په اروپايي ټولنې کې يې پانګونې ته وهڅوي. خو د چین رویه هم کلکه ده، که اروپايي ټولنه پر چیني برېښنايي موټرونو ګمرکي تعرفې زیاتې کړي، نو د چیني تصدیو پانګونو ته به لاسرسی پيدا نه کړي او اروپايي ټولنه په داسې کړنو نه شي کولی، چې پر چیني برېښنايي موټرو د مالیاتو د زیاتولو له لارې د دغه هېواد د تصدیو پانګونې را جلب کړي. د بازار پرانيسته او عادلانه زمینه تصدۍ راجلبولی شي او همدا یې تر ټولو مناسبه لاره ده.
اروپايي ټولنې پرېکړه کړې، چې له ۲۰۳۵م کال څخه وروسته به د تېلو موټرونو په پېر او پلور بنديز لګوي او د خپلو تصدیو لپاره يې دا یو ښه فرصت بللی، چې برېښنايي موتړونه تولید کړي، خو داسې ښکاري، چې پر وړاندې يې پروسه ډېره ستونزمنه ده.
شمېرې ښيي، سږ کال د اروپايي تصدیو د برقي موټرونو د پېر زیاتوالی ورو شوی او اروپايي مشتریان یې برقي موټرونه نه خوښوي، ځکه د اروپايي تصدیو د برقي موټرونو د سیالۍ توان کمزوری دی.
د اروپايي تصدیو پر وړاندې دوې ستونزې موجودې دي، لومړۍ ستونزه یې دا ده، چې د برقي موتړونو د پرزو د تولید د اړتیا وړ کارکوونکي يې د تېلو موټرو په نسبت نیمه برخه کمه ده، یعنې که د اروپا موټري تصدۍ د برقي موټرو د توليد په لوري روانې شي، نو هلته به د خلکو د روزګار ستونزه رامنځته شي او دوهمه ستونزه یې دا ده، چې اوسمهال په اروپا کې د برقي موټرو بازار سمسور نه دی.
که د اروپا موټري تصدۍ غواړي یادې ستونزې هوارې کړي، نو د برقي موټرو د څېړنې او تولید لګښت باید تر وسې کم کړي او خپلو برقي موټرو ته باید ښه بازار ومومي، خو دا چارې د چیني تصدیو له همکارۍ پرته نه شي عملي کولی او د اروپا د موټرو تصديو هم همدغه ټکی درک کړی دی.
د اروپا د بي اېم ډبليو او بېنز په شمول د ځینو تصدیو مسئولينو څو څو ځلې پر چیني برېښنايي موټرو د ګمرکي تعرفو له لوړولو سره مخالفت څرګند کړی او پر دې اند دي، چې د اروپايي ټولنې دغه کړنه به د جرمني د موټرو تصدۍ سختې زیانمنې کړي، د چین او اروپا ترمنځ سوداګریز توپیرونه به نور هم سخت کړي او دغه کړنه به یې کوم لوري ته ګټې ونه رسوي.
چین او اروپا لا هم پر برېښنايي موټرو د خبرو اترو فرصت لري، خو که اروپايي هېوادونه د حالاتو له مخې عاقلانه رویه غوره کړي.
