اروپايي ټولنې د اګست په ۲۰مې نېټې د برقي موټرونو له خپلو تصديو سره د چيني حکومت د مرستې ضد د پلټنې اخري پايله خپره کړې او په چین کې د چین او اروپايي ټولنې د تصدیو لخوا د تولید شويو برقي موټرونو پر وړاندې يې د ۵ کلونو لپاره له ۱۷ سلنې تر ۳۶،۳ سلنې ګمرکي تعرفې غوره کړې دي.
که اروپايي ټولنه دغه ګام عملي کړي، نو دا به نه یوازې د چین موټري تصدیو ګټې زیامنې کړي، بلکې د چین او اروپا ترمنځ د تولید او غرضې ځنځیرونو اړوندو همکاريو ته به هم سخت زیانونه ورسوي.
د یادولو وړ ده، د اروپايي ټولنې ياده نتیجه د تېرې جولاۍ په نسبت ډېر کم توپیر لري او یوازې د څو چیني موټري تصدیو پر وړاندې یې لږ څه مالیات کم کړي، خو په حقیقت کې یې هغه کړنې نه دي سمې کړي، چې د سوداګرۍ نړیوال سازمان له مقرراتو سره په ټکر کې دي.
اروپايي کمېسیون د تېر کال په اکتوبر کې د چیني برقي موټرونو پر وړاندې د حکومتي مرستې ضد پلټنه پیل کړه او له هغه وخت راهیسې یو لړ نامناسب او غير قانوني عملونه ترسره کوي.
یوه خوا، دغه پلټنه د اروپا د کومې صنعتي ټولنې لخوا نه ده وړاندې شوې او له بازاري هيلو سره په ټکر کې ده او له بلې خوا، اروپايي کمېسیون د خپلو شومو موخو لپاره د نمونو انتخاب او د پلټنې بهیر کې ډېر ناانډوله او بې ځایه ګامونه غوره کړي دي.
چین او اروپا له تېر جون راهیسې د برقي موټرونو د جنجالونو د حل لپاره لسګونه ځلې تخنیکي مشورې کړي، خو د اوسنۍ پلټنې پايلو کې يې د چين هېڅ وړانديز ته ځای نه دی ورکړی، بلکې هېڅ اشاره یې هم نه ده ورته کړې او پر خپلو ناسمو عملونو يې ټينګار کړی دی. اروپايي ټولنې د خپلو مالوماتو پر بنسټ ياده پایله خپره کړې او د دواړو خواوو منل شوي مالومات يې پکې نه دي ځای کړي او دا د دې ښکارندويي کوي، چې اروپايي ټولنه شعارونه او د مېز پر سر خبرې او ژمنې کوي، خو عمل پرې نه کوي.
دغه نتیجه د مقرراتو، قانوني ادارې او مساواتو په اړه د ځينو اروپايي سیاستوالو له شعارونو سره په ټکر کې ده. پر چیني برقي موټرونو د مالیاتو زیاتوالي په اړه د ځینو اروپايي سیاستوالو کړنې په اروپا کې دننه د سیاسي او سوداګريزو ټولنو له پراخ مخالفت سره مخ شوې دي.
د جرمني صدراعظم اولف شولز په شمول ځینو اروپايي مشرانو د موټرونو سوداګرۍ له محدودیت سره پرانیستی مخالفت څرګند کړی و او له ټولو يې غوښتي وو، چې د سوداګرۍ ازادي باید وساتي.
يو بل ټکی هم د یادولو دی، چې په دې وروستیو کلونو کې د اروپا اقتصادي پرمختګ کمزورتيا روانه ده او ځینې اروپايي هېوادونه د انرژۍ جوړښت د بدلون د اړتیا او د اقتصادي ودې د هڅونې لپاره د چیني موټري تصدیو د پانګونې د جلبولو په پار ډېر کوښښونه کوي. د ایټالیا صدراعظمې جورجيا ميلوني یوه موده مخکې چین ته د رسمي سفر په ترڅ کې له چیني مشرانو سره د نوې انرژۍ موټرونو د همکارۍ په پار عمده بحثونه کړي وو.
د چین او اروپا د همکاريو اصلي موخه په ګډو ګټو ورټوله ده. چین له اروپا سره په صمیمي رویې او د ډیالوګ او مشورو له لارې د سوداګرۍ اختلافاتو کې ښه چلند کوي، خو دا په دې مانا نه ده، چې اروپا به د چیني تصدیو قانوني ګټې زیانمنوي او یا به د اروپا د سوداګرۍ ساتونکو عملونو لپاره خپلې ګټې قرباني کوي.
چین د اګست په ۹مه د اروپا یاده نتیجه د سوداګرۍ نړیوال سازمان د شخړو د هواري میکانیزم ته وړاندې کړې او دا د دې ښکارندويي کوي، چې چین به د خپلو تصدیو قانوني حقونو د ساتلو لپاره اړين ګامونه اخلي.
د ايجنډا له مخې، اروپايي کمیسیون به د یادې نتیجې په اړه د وړاندیزونو تر راغونډېدو وروسته غړو هېوادونو ته وروستۍ پرېکړه په ډاګه کوي او د راتلونکي نومبر تر ۴مې پورې به وروستۍ پرېکړه کوي. له دې مخکې، اروپا باید په کور دننه د خلکو او تصديو اوازونه واوري او د شخړې له لا نور هم سختېدو څخه باید ډډه وکړي او له چین سره د شخړې د ښه حل پر لایحې باید مشورې وکړي.
