امریکا: د ا.ا پر وړاندې د وسله‌وال مخالفت ملاتړ نه کوو

امریکا وايي، په افغانستان کې د ا.ا پر وړاندې د هيڅ وسله وال مخالفت ملاتړ نه کوي. د امريکا د بهرنيو چارو وزارت وياند نيډ پرايس لويديځو رسنيو ته په استولي پيغام کې ويلي چې افغانستان کې دې ټول لوري خپلې ستونزې د خبرو له لارې هواري کړي. پرايس ويلي، نه يوازې دا چې واشنګټن په افغانستان کې د ا.ا پر وړاندې د وسله والو او تاوتريخجنو مخالفتونو ملاتړ نه کوي، بلکې د نړۍ پر نورو هېوادونو هم غږ کوي چې د وسله والو مخالفتونو ملاتړ ونه کړي. تر امريکا وړاندې بريټانيې هم دوه ځلې ډاډ ورکړی و چې افغانستان کې به د وسله والو مخالفتونو ملاتړ ونه کړي. امريکا وايي هيله لري چې افغانستان کې د خبرو له لارې ټولې ستونزې هوارې او ټيکاوو تينګ شي.