امریکا د ۶۵۰ میلیونه ډالرو په ارزښت پر سعودي وسلې پلوري

د امریکا دفاع وزارت ويلي چې سعودي عربستان ته به له هوا څخه هوا ته د ويشتونکو توغنديو له ورکړې سره د دغه هيواد امنيت نور هم ټينګ شي. د ولسمشر بايدن د ادارې له خوا پر سعودي عربستان د وسلو د پلور دا لومړۍ معامله ده.  د امریکا د دفاع وزارت اعلان وکړ چې پر سعودي عربستان يې د ۶۵۰ میليونه امريکايي ډالرو په ارزښت د وسلو د پلور يوه هوکړه کړې ده. د دې پر اساس به امريکا سعودي عربستان ته له فضا څخه فضا ته ويشتونکي ۲۸۰ عصري توغندي ورکوي. پنټاګون ويلي چې د امريکا د بهرنيو چارو وزارت هم د وسلو د پلور دا هوکړه تایید کړې ده څو د اوسنيو او راتلونکو خطرونو د ځواب ويلو له پاره له سعودي عربستان سره مرسته وشي. د امريکا د بهرنيو چارو وزارت وياند وويل چې په تېر میلادي کال کې پر سعودي عربستان د سرحد له بلې غاړې څخه بريدونه ډېر شوي دي نو ځکه یې پر سعودي د وسلو د دې پلور اجازه ورکړل شوې ده.