ای او ایم: د نورستان سېلاب‌ځپلې کورنۍ بېړنیو مرستو او سرپناه ته اړتیا لري

د کډوالۍ نړیوال سازمان (ای او ایم) وايي، په نورستان کې د وروستیو سختو سېلابونو له امله لسګونه کورنۍ له سخت بشري وضعیت سره مخ دي او سرپناه، د څښلو پاکو اوبو، خوراکي توکو او نورو لومړنیو مرستو ته بیړنۍ اړتیا لري. یاد سازمان ویلي، د زیانونو ارزونه او د بېړنیو مرستو د برابرولو چارې روانې دي. د لومړنیو معلوماتو له مخې، په دغو سېلابونو کې ۲۳ کسان مړه، ګڼ نور ټپیان شوي او پراخې زیربناوې او استوګنیز کورونه زیانمن شوي دي. ملګرو ملتونو هم ټینګار کړی چې سېلابونو د خلکو پر ژوند او لومړنیو اړتیاوو ژور اغېز کړی او ډېری کورنۍ بېړني بشري ملاتړ ته اړتیا لري.