چين د مارچ په ۱۷مې نېټې د روان کال د لومړيو دوو مياشتو اقتصادي شمېرې خپرې کړې دي.
د امريکې د تاپيسټري (Tapestry) شرکت د اسيا او ارام سمندر سيمې د چارو مسؤل يان باوزېک (Yann Bozec) رسنيو ته ويلي، چې د چين اقتصاد د جذابيت او پایښت بڼې ښکاره کړي او د بهرنيو شرکتونو د پرمختګ لپاره یې نوي فرصتونه برابر کړي دي.
یان باوزېک ويلي، شرکت به یې تر ۲۰۲۵م مالي کال پورې په چين کې د نويو پلورنځيو شمېر ۱۰۰ته ورسوي او دا ټول پلورنځي يې په ۳ کالونو کې جوړ کړي دي.
وال سټريټ جورنال او ځينو نورو بهرنيو رسنيو په چین کې د مصرف او صنعتي تولید په برخو کې د حیرانوونکي پرمختګ د پياوړيو نښو راپورونه ورکړي دي.
دغه نښې په کومو برخو کې دي؟
۱. ثابت پرمختګ
د روان ميلادي کال په لومړيو دوو میاشتو کې، د چین د اقتصاد اصلي شاخصونو د تېر کال په پرتله چټکتیا ښودلې ده. د بېلګې په توګه، د لويې پيمانې د صنعتي تولید ارزښت يې ۵ اعشاريه ۹ سلنه زیاتوالی موندلی، چې د زياتوالي سرعت يې د تېر کال په پرتله صفر اعشاريه يو سلنه ډېروالی ښيي او په غير منقولو سرمايو کې د پانګونې زياتوالی یې د تېر کال په پرتله صفر اعشاريه ۹ سلنه چټک شوی دی. په ټوله کې، د تېر کال له څلورمې ربعې څخه راپدېخوا د چين اقتصادي خوځښت دوام لري او ثابت پرمختګ کوي.
۲. د ثابت پرمختګ پر بنسټ د چين د اقتصاد نوې بڼې
د روان کال په لومړيو دوو میاشتو کې، د چین د لوړې ټکنالوژۍ لرونکو چارو تولیدي ارزښت زياتوالی د تېر کال په پرتله صفر اعشاريه ۲ سلنه چټکتیا ښودلې او د لوړې ټيکنالوژۍ چارو کې يې د پانګونې د زياتوالي سرعت د پانګونې د عمومي حالت په پرتله چټکوالی ښودلی دی.
دا د دې څرګندويي کوي، چې د چين د نوي کيفيت تولیدي ځواکونه د ثابت پرمختګ په حال کې دي او همدارنګه، په تېرې فبرورۍ کې يې د تولیدي صنعت د مدیريت شاخص او د غیر صنعتي توليد سوداګريزو فعالیتونو شاخصونه د جنورۍ په پرتله لوړ شوي او د مصرفوونکو باوري شاخص یې په پر له پسې درېيو میاشتو کې لوړ شوی او کوربه سوداګريزو شرکتونو خپل اټکلونه او هيلې پر له پسې لوړې کړې دي.
۳. د چين اقتصاد روان کال په ثبات، نوښت او ښه والي پيل کېږي.
د چين حکومت د اقتصادي پرمختګ يو لړ تګلارې برابرې کړي او په تېره بیا له تېر کال راهیسې يې ډېرې تنظيم کړې دي.
چين په تولیدي برخو کې د صنعت د چټکې ودې او د تقاضا لپاره یې د بازار د فعال کېدو هڅونه کړې او د پام وړ پایلې يې ترلاسه کړې دي.
د روان کال په لومړيو دوو مياشتو کې د چين اقتصادي شمېرې د بهرنيو منفي اغېزو د زياتوالي او د تېر کال د همدې مودې د لوړو شمېرو په شتون کې ترلاسه شوي، چې کارپوهان دا يوه ډېره سخته دنده بولي.
د چين دغو برياوو نه يوازې د لومړۍ ربعې لپاره ښه بنسټ برابر کړی، بلکې د ټول کال لپاره يې د ښه پيل پيغام ورکړی دی.
بهرنيو رسنيو په وروستۍ موده کې د چین د اقتصاد مثبته ارزونه کړې ده.
د بریتانیا «فایننشل ټایمز» ويلي، بهرني پانګوال اوس په چین کې نوي فرصتونه لټوي او په دې نظر دي، چې دغه هېواد به نړۍ ته په ځانګړو برخو کې نوښتونه او فرصتونه برابر کړي.
۴. د چين بازار د نړۍ لپاره یوهارزښتمنه سرچېنه ده
د روان کال په لومړيو دوو میاشتو کې د چین د ټولنیز مصرف عمومي اندازې د تېر کال د همدې مودې په پرتله ۴ سلنه زیاتوالی ښودلی او د زياتوالي سرعت یې د تېر کال په پرتله صفر اعشاريه ۵ سلنه چټکتيا ښيي.
د پسرلني اختر په درشل کې، د «نجا۲» کارتوني فلم د ټکټونو ارزښت پنځم نړيوال مقام نيولی او د چين په خدمتي چارو کې يې پياوړی خوځنده ځواک ښودلی دی.
د چين د ملي ولسي کانګرېس او د ولسي سياسي مشورتي کنفرانس د ملي کمېټې په سږنيو دوو غونډو کې د مصارفو پياوړتيا ته لومړيتوب ورکړل شوی دی.
چين د مارچ په ۱۶مې نېټې د مصارفو د پياوړتيا ځانګړی عملي سند خپور کړی او د کلتور، سپورټ او سيلانۍ په شمول ځينو برخو کې يې د مصرفي چارو ترتيتبات برابر کړي دي.
۵. نوښت د پرمختګ انجن دی
په چين کې د ساينس او ټېکنالوژيو د نوښتونو او د توليدي چارو د نوښت په يو ځای کېدو سره د پرمختګ نوی انجن ګړندۍ وده کوي او په ځانګړې توګه د ډيپسيک (DeepSeek) په شمول د مصنوي ځيرکتيا ټېکنالوژۍ له پرمختګ سره يې اقتصاد چټک غوړېدلی او بهرنيو شرکتونو ته يې زيات فرصتونه برابر کړي دي.
د جرمني د کارچر (kärcher) شرکت د چيني بازار مرستيال مشر که ژې لين رسنيو ته ويلي، چې د چين د مصنوعي ځيرکتيا ټکنالوژۍ چټک پرمختګ کوي او دا مانا ورکوي چې په راتلونکې کې به د پاکۍ چارې اتوماتيکې او خيرکې شي.
نوموړي ويلي، شرکت به يې د مصنوعي ځيرکتيا په چارو کې څېړنې زياتې او د نوې ټېکنالوژۍ بازاري وړتياوې به پوره کړي.
۶. د چین بازار بهرني شرکتونه هڅوي، چې په دغه هېواد کې اوږمهاله پانګونه وکړي
چين تېره میاشت د ۲۰۲۵م کال د بهرنيو پانګونو د ثبات عملیاتي پلان خپور کړی او د دوو ملي مجلسونو د سږنيو غونډو د لوړې سويې د ورخلاصون معلومات يې پکې ورکړي دي.
په چين کې د بهرنۍ پانګونې لپاره فرصتونه زيات شوي، لارې چارې پکې ډېرې او د کاروبار اسانتياوې برابرې شوې دي.
په چين کې د روان کال له پيل راهيسې د مهمو بهرنيو پانګوالو د سرمايه ګذارۍ پروژې پيل شوې او د پلان له مخې به په چين کې څه باندې ۳۳ميليارډه ډالره پانګونه وکړي.
