د ایران په روانو لاریونونو کې تر دې دمه ۴۱۹ تنه وژل شوي دي

د ايران د بشري حقونو د څار ډلې ويلي چې دغه هېواد کې د لاريونونو پر مهال د وژل شويو کسانو شمېر ۴۱۹ تنو ته رسېدلی دی. په ايران کې د روان کال د سنبلې له وروستيو د تهران د اخلاقي امنيت پوليسو له لوري د مهسا اميني په نوم د يوې کردۍ پېغلې تر وژل کېدو وروسته پراخ لاريونونه پيل شوي چې اخوندي رژيم يې د کرارولو لپاره پر ځپلو لاس پورې کړې دی. د ايران د بشري حقونو څارډلې ويلي چې تر پرون ورځې پورې را ټول شوي ارقام ښيي چې د لاريونونو په ترڅ کې د ۶۰ ماشومانو په ګډون ۴۱۹ تنه وژل شوي او دغه راز ۱۷ زره او ۴۵۱ تنه نور نيول شوي او زندانونو ته اچول شوي دي.