د ا.ا سرتېرو ته د صورت او سیرت جوړولو سپارښتنه شوې

دفاع وزارت وايي چې د لوی درستیز مرستیال په مشرۍ د امنيت او حمايې لوا کې اصلاحي غونډه جوړه شوه چې په کې امنیتي سرتېرو ته د خپل صورت او سیرت جوړولو سپارښتنه وشوه. د دغه وزارت له خوا په یوه خپره شوې خبرپاڼه کې راغلي، د لوی درستیز مرستیال حاجي مالي خان “صديق” د ستر درستيز د امنيت او حمايې لوا د جزوتامونو له مسوولینو او مجاهدینو سره په اصلاحي غونډه کې ګډون وکړ او امنیتي سرتېرو ته د توصيې ترڅنک یې ورته د اسلامي شریعت په چوکاټ کې د سيرت او صورت جوړولو سپارښتنه وکړه او د مشرانو د حکمونو پر اطاعت یې ټینګار وکړ. خبرپاڼه کې راغلي، په دې کتنه کې د ملي دفاع وزارت د عقيدتي او فرهنګي چارو ریيس مولوي نور محمد متوکل هم د مجاهدينو د سيرت او څېرې پر اصلاح او د اميرالمؤمنين د سپارښتنو او ارشاداتو پر عملي کولو ټينګار وکړ.