د سوډان دولت له خپلې مخالفې وسله والې ډلې سره سوله کړې ده

ه سوډان کې د دولت او د هغه وسله والو مخالفینو ترمنځ د سولې هوکړه لاسلیک شوه. ملګرو ملتونو د دغه تړون د هرکلي ترڅنګ ویلي چې د هوکړې ټولو برخو عملي کیدو لپاره د سوډان له دولت سره همکاري کوي. د عربي او د افریقایي هیوادونو ټولنو او سعودي عربستان د دې تړون هرکلی کړی او د همکارۍ ژمنې یې کړي دي. د سوډان دولت او دارفور جنګي ډلې ترمنځ دا هوکړه له ۱۷ کلونو جګړې او لسو میاشتو مذاکراتو وروسته د تیرې دوشنبې په ورځ د سویلي سوډان په منځګړیتوب لاسلیک شوی دی. دولت او مخالفې ډلې د امنیت، په پوځ کې د جنګیالیو ادغام، انتقالي عدالت، د زیانونو جبران او تاوان، پراختیا، د شتمنیو ویش، د واک ویش او بې ځایه شوو لپاره ۸ بیل بیل پروتوکلونه لاسلیک کړي دي. سوډاني چارواکي وایي د سولې بهیر بشپړیدو سره به انتقالي حکومت واک نوي حکومت ته ور سپاري.