تر اوسه په ټوله نړۍ کې پر کرونا ویروس تر دوه نیم میلیونه ډېر کسان اخته شوي، په دې مانا چې کرونا ویروس نیږدې د نړۍ هرې برخې ته ځان رسولی دی. خو د جان هاپکنز پوهنتون د معلوماتو له مخې لا هم په آسیا، افریقا او اقیانوسیه کې ۱۵ داسې هېوادونه شته چې د کووېډ ۱۹ مثبتې پېښې پکې صفر دي، په دې مانا چې په دې هېوادونو کې کرونا ویروس نه دی خپور شوی.
له دې هېوادونو ځینې یې په جزیره یي سیمو کې دي، داسې چې د جغرافیایي موقعیت له مخې له نورو بېل دي، لکه د میکرونزیا او پولینزیا جزیرې. خو درې هېوادونه چې په اسیا کې دي، که څه هم له هغه هېوادونو سره چې کرونا ویروس پکې خپور شوی دی، شریکې پولې لري، مثبتې پېښې نه دي پکې ثبت شوې، دا چې دوی څومره رښتیا وایي خلک ورته د شک په سترګه ګوري.
اوس راځو د نړۍ هغه پنځلس هېوادونو ته چې تر اوسه پورې پکې کووېډ ۱۹ ویروس نه دی خپور شوی.
۱- کومور يا د قمر د جزایرو مجموعه:
کومور ۲۳۵،۲ کیلومتره مربع پراخوالی او د یو میلیون په شاوخوا کې نفوس لري. دا هېواد د آفریقا په ختیځ ساحل کې پرته جزیزه ده، چې په کلني ډول یوازې ۳۶۰۰ کسان ترې لیدنه کوي. ددې هېواد چارواکو ټول بهرني سفرونه لغوه کړي دي. په دې هېواد کې تر اوسه پورې د کرونا ناروغۍ مثبته پېښه نه ده ثبت شوې.
۲- کرایباتي:
دې هېواد ته په کال کې یوازې ۶۰۰۰ کسان تګ راتګ کوي. د نړۍ یوازنی هېواد دی چې سفر کول ورته سخت دي. کېدای شي همدا لامل وي، چې تر اوسه پورې پکې کرونا ویروس نه دی خپور شوی.
۳- لسوتو:
کومور او لستو هغه دوه افریقایي هېوادونه دي، چې تر اوسه پورې پکې د کووېډ ۱۹ ویروس نه دی خپور شوی. لستو له جنوبي افریقا پرته د نړۍ له بل هېڅ هېواد سره ګډه پوله نه لري. که څه هم چې په جنوبي افریقا کې تر اوسه پورې زرګونه کسان په یاد ویروس اخته شوي دي، خو دغه هېواد لا بچ پاتې دی. یا کېدای شي مثبتې پېښې ولري، خو ثبت شوې نه وي.
۴- د مارشال جزایر:
دغه هېواد په آرام سمندر کې پرته جزیره ده چې ټول پراخوال یې ۱۸۱ کیلو متره دی. د مارشال جزایرو ته هم بهرني سفرونه ډېر محدود وي او کېدای شي د چارواکو احتیاطي تدابیر یې ددې لامل شوي وي، چې تر اوسه پورې پکې کرونا ویروس نه دی خپور شوی.
۵- میکرونزي، فدرال ایالات:
دا هېواد په خپله د جزایرو یوه مجموعه ده چې ۶۰۷ جزیرې پکې رانغښتې دي. د معلوماتو له مخې تر اوسه پورې په دې هېواد کې هم د کرونا کومه مثبته پېښه نه ده ثبت شوې.
۶- نایورو:
دا کوچنی هېواد د ۱۰۰۸۰ کسانو په شاوخوا کې نفوس لري، یوازې یو روغتون لري چې هغه هم ونټیلاټور نه لري. په کلني ډول یوازې ۲۰۰ سیلانیان له دې هېواد څخه لیدنه کوي. نو دې ټکي ته په کتو ډېره د حیرانتیا وړ خبره نه ده چې تر اوسه پورې پکې ولې کرونا ویروس نه دی خپور شوی.
۷- شمالي کوریا:
شمالي کوریا ته هم باید حیران نه شئ، چې ولې پکې کرونا ناروغي ن ده خپره شوې؛ دا ځکه چې له نړۍ سره ددې هېواد اړیکې په نشت حساب دي. پرته له ځینو محدودو هېوادونو د نورو هېوادونو وګړي شمالي کوریا ته سفر نه شي کولای، که یې وکړي هم له ډېرو محدویتونو سره مل وي. شمالي کوریا له چین، روسیې او جنوبي کوریا سره پولې هم لري او دا هغه هېوادونه دي چې د کرونا پېښې پکې ډېرې وې، خو بیا هم تر اوسه پورې پکې د کومې مثتبې پېښې خبر نه دی ورکړل شوی. ددې ترڅنګ د روغتیا نړیوال سازمان وایي، چې شمالي کوریا هغه هېواد دی چې تنفسي ناروغي ډېرې پکې پېښېږي، چې دغه څه پر کرونا ویروس اخته کېدو ته زمینه هم برابرولای شي. یاد سازمان وایي په کلني ډول ۱۱ سلنه خلک په دغه هېواد کې د تنفسي ناروغیو له کبله مړه کېږي. یوه بله خبره هم شته، کېدای شي د کرونا ویروس پېښې پکې ثبت شوې وي، خو په یاد هېواد کې معلوماتو لاس رسی خلکو ته د مرګ په بیه تمامېږي.
۸- پالائو:
دې هېوا له کرونا څخه د مخنیوي په موخه د آرام سمندر له لارې د چین او هانګانګ څخه ورتلونکي کسان منع کړي دي. دا هېواد هم د هغه پنځلسو هېوادونو په ډله کې دی چې تر اوسه پورې پکې د کووېډ ۱۹ ویروس نه دی خپور شوی.
۹- ساموآ:
ساموآ ۱۹۸۴۱۳ تنه نفوس لري، ظاهرآ خو داسې ښکاري چې توانیدلی څو کرونا ویروس پکې خپور نه شي. خو له دې سره سره پکې د مارچ په ۲۰ مه نېټه بیړنی حالت اعلان شو. په یاد هېواد کې تر اوسه پورې ټول بهرني سفرونه ځنډېدلي دي.
۱۰- د سلیمان جزایر:
په دې هېواد کې هم تر اوسه پورې د کرونا کومه مثبته پېښه نه ده ثبت شوې. یاد هېواد د مارچ میاشتې له ۲۳ نېټې وروسته هېڅ بهرني وګړي ته د ورتلو اجازه نه ده ورکړې.
۱۱- تاجکستان:
له چین سره نیږدې پولې درلودلو او له نهه میلیونه ډېر نفوس ته په کتو ناشونې ښکاري چې تر اوسه پورې دې په دغه هېواد کې د کووېډ۱۹ ویروس نه وي خپور شوی. خو په رسمي ډول پکې تر اوسه د کومې مثبتې پېښې راپور نه دی ورکړل شوی.
۱۲- ټانګو:
د رسمي شمېرو له مخې ټانګو هېواد هم تر اوسه پورې له کووېډ ۱۹ ویروس پاک دی او کومه مثبته پېښه نه ده پکې ثبت شوې. دې هېواد هم خپلې ټولې پولې د بهرنیو وګړو پر مخ تړلې دي.
۱۳- ترکمنستان:
ترکمنستان؛ که څه هم چې د دوو هغه هېوادونو په منځ کې پروت دی، چې کرونا ویروس پکې خپور شوی دی، خو بیا هم ادعا کوي، چې تر اوسه پورې پکې د کرونا ویروس کومه مثبته پېښه نه ده ثبت شوې.
۱۴- تووالو:
په کال کې د یوازې د ۲۰۰۰بهرنیو سیلانیانو په درلودلو سره کېدای شي ډېر د تعجب وړ خبره نه وي، چې په دې هېواد کې دې تر اوسه کرونا ویروس نه وي خپور شوی.
۱۵- وانواتو
دغه هېواد ټول ۳۰۷۱۴۵تنه نفوس لري، چې یوه یې هم تر اوسه پورې د کرونا ویروس معاینات نه دي کړي.
