د پاکستان پارلمان کې د تحریک انصاف ګوند استازو استعفا کړې

د پاکستان په پارلمان کې د عمران خان په مشرۍ د تحريک انصاف ګوند استازو استعفا کړې ده. د تحريک انصاف ګوند غړو دا پرېکړه له خپلمنځي غونډې وروسته اعلان کړه. ګوښه شوي لومړي وزیر له غونډې وروسته وویل، دوی په پارلمان کې له (هغوی) سره چې اشاره يې د اپوزيسيون ګوندونو ته وه، يو ځای نه شی کيناستی. په ورته مهال د پاکستان د اطلاعاتو او قانون وزیر فواد چودري هم خبريالانو ته ويلي چې د تحريک انصاف غړي ټول په يوه خوله استعفا کوي او غواړي چې د ازادۍ لپاره مبارزه وکړي. د تحريک انصاف دا پريکړه په داسې حال کې ده چې ټاکل شوې وه، نن په پارلمان کې د نوي لومړي وزير د ټاکلو لپاره رايې اچونه وشي. د اپوزيسيون ګوندونو د ائتلاف مشر او د پخواني لومړي وزير نواز شريف ورور شهباز شريف د دې ټاکنو احتمالي ګټونکی بلل کيده.