د روان کال د مارچ په ۱۲مه نېټه، د چین د څوارلسم ملي ولسي کانګرس څلورمې غونډې د ۲۰۲۶ څخه تر ۲۰۳۰ کلونو پورې د ملي اقتصاد او ټولنیز پرمختګ د پنځلسم پنځه کلن پلان د عمومي طرحې په اړه پرېکړه تصویب کړه. له شلمې پېړۍ د ۱۹۵۰مو کلونو له پیل راهیسې، چین ۱۴ پنځه کلن پلانونه جوړ او عملي کړي دي، چې د هېواد د اوږد مهاله پرمختګ لپاره یې قوي بنسټ ایښی دی. همدا علمي پلان جوړونه او پرله پسې تطبیق و چې چین یې له بېوزلۍ او وروسته پاتې حالت څخه د نړۍ دوهم لوی اقتصاد ته ورساوه.
د «پنځلسم پنځه کلن پلان» موده هغه مهم پړاو دی چې پکې د سوسیالیستي عصري کېدو بنسټونه ټینګېږي او هر اړخیز پرمختګ ته زور ورکول کېږي. اوس مهال، د نړۍ د سلو کلونو بدلونونه په چتکۍ سره پرمختګ کوی او د بهرني چاپېریال بېثباتي او ناڅرګندتیا زیاته شوې ده. په دې شرایطو کې، د چین لهخوا د دې پلان جوړول او عملي کول نه یوازې د خپل هېواد پرمختګ پورې تړاو لري، بلکې د نړۍ له ثبات او پرمختګ سره هم نږدې اړیکه لري.
لومړی: د چین د پرمختګ یقیني والی په څرګند ډول زیات شوی دی. “پنځلسم پنځه کلن پلان» د اقتصاد، نوښت، د خلکو هوساینې، شنې او ټیټ کاربن پرمختګ او امنیت په برخو کې ۲۰ مهم شاخصونه ټاکي. همدارنګه، د لوړ کیفیت پرمختګ، د کورني اقتصادي دوران پیاوړتیا، د ټولو خلکو ګډه شتمني، او د پرمختګ او امنیت همغږي د څلورو ستراتیژیکو موخو په توګه ټاکل شوي دي، او ۶ برخو کې ۱۰۹ مهمې پروژې وړاندې شوې دي. د دې منظم پلان له لارې، چین د خپل نظام او سیستم غوره والی او ملي ځواک له برترۍ څخه په ګټې اخیستنې سره، د چینایي سبک عصري کېدو نوې پاڼې پرانیزي او د ۲۰۳۵ کال تر هدفونو پورې په ثابتو ګامونو روان دی.
دوهم: د چین د پرمختګ ثبات لا پیاوړی شوی دی. “پنځلسم پنځه کلن پلان» د پرمختګ او امنیت ترمنځ توازن ساتي او د خوړو، انرژۍ، مالي نظام او سایبري امنیت په برخو کې بنسټیز تضمینونه پیاوړي کوي. همدارنګه، د عامه امنیت سیستم بشپړوي او د ادارې وړتیا لوړوي. په عین وخت کې، د «ثبات سره پرمختګ» تګلاره تعقیبوي، کورني او نړیوال وضعیتونه سره همغږي کوي، او د هېواد په کچه د یو متحد بازار جوړول ژوروي، چې دا ټول د اقتصاد داخلي ځواک او د خطرونو پر وړاندې مقاومت زیاتوي. چین، د نړۍ تر ټولو لوی احتمالي مصرفي بازار او لوی پرمختللی اقتصاد په توګه، لا هم د نړیوال اقتصادي ودې یو مهم ثابت ځواک پاتې کېږي.
دریم: د چین پرمختګ نوي محرکات او فرصتونه رامنځته کوي. “پنځلسم پنځه کلن پلان» پر واقعي اقتصاد تمرکز کوي او د ټکنالوژۍ نوښت د نوې تولیدي ځواک د ودې لپاره بنسټ ګرځوي. همدارنګه، د نوو او راتلونکو صنعتونو روزنه او پراختیا ته وده ورکوي. د نوي پرمختیایي مفکورې تر لارښوونې لاندې، مصنوعي ځیرکتیا، پرمختللې تولیدي ټکنالوژي او نوې انرژي په چټکۍ سره وده کوي، چې نه یوازې د چین لپاره بلکې د نړۍ نورو هېوادونو ته هم نوي فرصتونه برابروي او د نړیوالې همکارۍ لپاره نوې لارې پرانیزي.
د چین د «پنځلسم پنځه کلن پلان» بنسټیز اصول لکه د خلکو لومړیتوب، لوړ کیفیت پرمختګ، او د پرمختګ او امنیت همغږي، د افغانستان د ملي بیا رغونې، د خلکو د ژوند د ښه والي او سیمهییز اتصال اړتیاوو سره سمون لري. افغانستان د مرکزي، جنوبي او لوېدیځې اسیا ترمنځ په مهم موقعیت کې پروت دی. د زیربناوو نښلول، د سوداګرۍ پراخول، او صنعتي همکاري نه یوازې د افغانستان لپاره، بلکې د ټولې سیمې د ثبات او سوکالۍ لپاره مهم دي.
چین چمتو دی چې د پالیسیو د همغږۍ له لارې، او د عملي همکاریو په وسیله، د «یو کمربند، یو سړک» نوښت په لوړ کیفیت سره پرمخ یوسي، او په سیاسي، اقتصادي او کلتوري برخو کې همکاري نوره هم پراخه کړي. هدف دا دی چې پلانونه په واقعي پرمختګ او د خلکو په هوساینې بدل شي، ګډ پرمختګ ترلاسه شي، او د سیمې سوله او ثبات ټینګ شي.
