د پوهنتون استادان: هېواد کې تېرې علمي لاسته راوړنې په اوبو لاهو کيږي

د دولتي او شخصي پوهنتونو ځينې پخوانیو ریسانو او استادانو ملګرو ملتونو ته د ا.ا د چارواکو د تګلارې او کړنلارې په اړه لیک لیږلی. دغه شپږ مخیزه لیک پرون د ملګرو ملتونو د سر منشي انتوني ګوترېش په نوم لېږل شوی چې پکې د ښځو پر زده کړو او کار بندیز په تړاو د ا.ا تګلارې ننګول شوې دي. په دغه اوږده او توضیحي لیک کې استادانو شکایت کړی چې د ا.ا سختو تګلارو د افغانانو  په ځانګړي ډول د مېرمنو پر وضعیت سخت منفي اغېز کړی او په وینا یې د تېرو دوو لسیزو ډېری لاسته راوړنې په اوبو لاهو کیږي. په دغه لیک کې راغلي د تحصیل، زدکړو او کار برخه کې د افغانستان ټولې لاسته راوړنې له سخت ګواښ سره مخ دي.