د چمن په پرلت کې له ګډون وروسته، علي وزیر بیا نیول شوی

د پښتون ژغورنې غورځنګ مخکښ غړی علي وزیر په دېره اسماعیل خان کې د پولیسو له لور نیول شوی دی. علي وزیر داسې مهال نیول شوی، چې د چمن له پرلت څخه د ستنېدو په حال کې و. نوموړي تېره ورځ د چمن په پرلت کې ګډون کړی و او په دغه پرلت کې د وینا پر مهال یې پر پاکستاني حکومت توندې نیوکې وکړې. هغه د پاګستان د حکومت د هغې پرېکړې په غبرګون کې چې له دې وروسته به د چمن له لارې په پاسپورټ او ویزه تګ راتګ کېږي وویل، چې پر سپین بولدک ـ چمن دروازه پاسپورټ نه مني او له افغان وطن څخه د پښتنو په زور اېستل او د هغوی کاروبار یرغمل کول د منلو نه دي. په دغه پرلت کې تر ګډون وروسته علي وزیر د درابن په سیمه کې د پولیسو له‌خوا نیول شوي دی. د پاکستان پولیسو لا د هغه د نیولو په تړاو څه نه دي ویلي. علي وزیر تر دې وړاندې هم په ځلونو د پاکستاني پولیسو له‌خوا نیول شوی و او یوه موده یې په زندان کې هم تېره کړې ده.