د لاوس د خلکو د انقلابي ګوند د مرکزي کمېټې عمومي منشي او دولت رئيس تونګلون سيسوليت د جون له دوهمې نېټې څخه تر شپږمې نېټې پورې له چين څخه رسمي ليدنه کړې ده. د دواړو هېوادونو او نړيوالې ټولنې افکارو د نوموړي دغه سفر ته مثبته قدرداني ورکړې.
له چين څخه د تونګلون د ليدنې په ترڅ کې د دواړو ګوندونو او دواړو هېوادونو مشرانو په دې اړه توافق کړی، چې د دواړو هېوادونو د اړيکو د لا لوړوالي او د دواړو هېوادونو ترمنځ د نوې زمانې او هر فصل د ګډ برخليک ټولنې د ابادۍ لپاره لاسونه يو کړي. شنونکي پر دې نظر دي، چې دغه توافق د نوي تاريخي مبدا پر وړاندې د دواړو ګوندونو او دواړو هېوادونو د اړيکو د پرمختګ نوې نقشه روښانه کړې او د عصري کېدو نوې مرحلې ته به د دواړو هېوادونو ځانګړې چارې ورسوي او د انسانانو د ګډ برخليک ټولنې د ابادۍ لپاره به بېلګه جوړه کړي.
چين او لاوس به څنګه د نويو حالاتو پر وړاندې خپلمنځي اړيکو او د دواړو هېوادونو د ګډ برخليک ټولنې ابادۍ ته د لوړ معيار، لوړ کيفيت او لوړې کچې وده ورکړي؟
شي جين پينګ له تونګلون سره د ليدنې په ترڅ کې دې ته اشاره کړې، چې دواړه هېوادونه بايد پر سوسياليزم ټينګار وکړي، د ګټې – ګټې همکارۍ بنسټ دې لا کلک کړي، د خلکو عنعنوي دوستي دې لاټينګه کړي او په بهرنيو تګلارو کې دې خپلمنځي همغږي پياوړې کړي. څېړونکي پر دې نظر دي، چې د شي جين پينګ نظريو د چين او لاوس ترمنځ د نوې زمانې او هر فصل د ګډ برخليک ټولنې د ابادۍ مسير په ډاګه کړی او د دوه اړخيزو اړيکو د دوام او ودې لپاره يې ستراتيژيکه لارښوونه برابره کړې ده.
متقابل سياسي باور د دوه اړخيزو اړيکو بنسټ دی. چين تل لاوس د ګاونډيتوب د ډيپلوماسۍ مهم لوری بولي او د دې ټينګ ملاتړ کوي، چې لاوس د خپل دولتي وضعيت سره سم سوسياليستي لاره غوره کړې. لاوس په دې اړه رويه څرګنده کړې، چې تل به د يو چين پېژندنې پر اصل ټينګار وکړي او د رئيس شي جين پينګ د مهمو نړيوالو نوښتونو ملاتړ ته به دوام ورکړي. په داسې حال کې، چې نړيوال او سيمه ييز وضعيت له پېچليو بدلونونو سره مخ دی، د چين او لاوس ترمنځ د لوړې کچې متقابل سياسي باور نه يوازې د خپل پرمختګ او سمسورتيا لپاره ګټور دی، بلکې د نړۍ د سوسياليستيکو چارو پرمختګ به وهڅوي.
د لوړ کيفيت د ګټې – ګټې همکارۍ پياوړتيا د چين او لاوس د اړيکو د لوړوالي اړين کار دی. چين د لاوس لپاره د پانګونې لومړۍ لويه سرچينه او دوهم لوی سوداګريز ملګری دی. په ۲۰۲۵م کال کې د دواړو هېوادونو د سوداګرۍ حجم ۹ مليارډ او ۸۲۰ مليون امريکايي ډالره و، چې د ۲۰۲۴م کال په پرتله ۱۹ اعشاريه ۳ سلنه زياتوالی ښيي. د چين – لاوس رېل پټلۍ د کمربند او لارې يوه نمونوي پروژه ده. دغه رېل پټلۍ څلور کاله مخکې د ګټې اخيستنې ته سپارل شوي او تر اوسه ورباندې د مسافر وړونکو اورګاډيو د تګ راتګ شمېر سل زرو ته رسېدلی او د مسافرو شمېر يې له ۷۳ ميليونو زيات شوی او له ۸۴ ميليون ټنو څخه زيات مالونه ليږد راليږد شوي دي. دغه رېل پټلۍ د دواړو هېوادونو د همکارۍ او د سيمه ييز اقتصادي پرمختګ د هڅونې طلايي لار بلل کيږي.
تونګلون د دغه سفر په ترڅ کې د جه جيانګ ولايت په هانګ جو ښار کې د روبوټونو له نندارتون څخه ليدنه وکړه او په بېجينګ کې يې د چين د فضايي ټېکنالوژۍ څېړنيزې اکاډمۍ ته لاړ. د لاوس خبري رسنيو ويلي، له دغو ليدنو څخه ښيي، چې د نوښت صنايع او د ډيجټلي کېدو چارې د دواړو هېوادونو په همکاريو کې لا مهم رول لوبوي. چيني لوري د دواړو خواوو په ملاقات کې ويلي، چې د چين او لاوس د اقتصادي دهليز ابادۍ به پياوړې کړي، د چين، لاوس او تايلنډ د رېل پټليو پيوستون ته به وده ورکړي او د کرنې، برېښنا، مصنوعي ځيرکتيا او ډيجټلي اقتصاد په شمول په دوديزو او نويو برخو کې به دوه اړخيزې همکارۍ زياتې کړي.
د چين او لاوس ترمنځ اړيکې تر پخوا بل هر وخت ښې مرحلې کې دي او د پرمختګ له روښانه امکاناتو سره مخ دي. دواړه هېوادونه د دواړو لوریو د نوې زمانې او هر فصل د ګډ برخليک ټولنې د ابادۍ په هڅه کې دي او ورسره به د پرمختګ نوي فرصتونه تر لاسه کړي، د سيمې سولې او سمسورتيا ته به نوی خوځنده ځواک ورسوي او د خپلمنځي دوستۍ نوې پاڼه به واړوي.
