د چين د رسمي شمېرنو له مخې، د روان کال په لومړيو اوو میاشتو کې د دغه هېوا د مالونو د صادراتو او وارداتو ارزښت ۲۳.۶ ټريليون يوانو ته رسېدلی، چې د زیاتوالي سرعت يې د تېر کال د همدې مودې په پرتله ٪ ۱۰.۴ زياتوالی ښيي، دغه راز د روان کال په جولای کې د دغه هېواد د بهرنۍ سوداګرۍ ارزښت د تېر کال د جولای په پرتله ٪ ۱۶.۶ زیاتوالی ښيي. دغه شمېرې داسې مثبت پيغام ورکوي، چې د چين اقتصاد په پرله پسې توګه د غوړېدو په حال کې دی.
د چين د ګمرکاتو عمومي ادارې د شمېر تحليل رياست مشر لي کوي ون وايي، هېواد يې د روان کال له پيل راهيسې د کرونا وبا د کابو کولو ترڅنګ د اقتصادي او ټولنيز پرمختګ د ساتلو په موخه اغېزمن اقدامات غوره کړي او د بهرنۍ سوداګرۍ صادراتو او وارداتو يې له بهرنيو بازاري ستونزو او د کرونا وبا له منفي اغېزو سره سره بيا هم چټک پرمختګ کړی دی.
د روان کال په اپرېل کې د چين د بهرنۍ سوداګرۍ د زیاتوالي سرعت صفر اعشاريه يو سلنې ته راټيټ او په مې او جون مياشتو کې بيا چټک لوړ شوی چې په جلاجلا توګه ٪ ۹.۵ او ٪ ۱۴.۳ ښودل شوی دی. په جولای مياشت کې ياد ارزښت همدغه مثبت تمايل ښيي.
د چين د يانګ ځه سيند ډېلټا سيمې او يو شمېر نورو اقتصادي زونونو د دغه هېواد د بهرنۍ سوداګرۍ د زياتېدو لپاره د پام وړ رول لوبولی دی. د روان کال په لومړيو اوو مياشتو کې د يانګ ځه سيند ډېلټا سيمې د صادراتو او وارداتو ارزښت چې درې ولايتونه او يو ښار پکې شامل دي، د تېر کال د همدې مودې په پرتله ٪ ۱۱.۷ زیاتوالی ښودل شوی او د زیاتوالي چټکتیا يې د روان کال د لومړۍ نيمايي په پرتله دوه اعشاريه پنځه سلنه زياتوالی ښيي. د روان کال په جولای مياشت کې دغه ارزښت د تېر کال د جولای په پرتله ٪ ۲۵.۷ زیاتوالی ښيي چې د ټول هېواد د بهرنۍ سوداګرۍ لپاره يې د خدماتو انډول له ٪ ۵۰ زيات شوی دی.
د چين د بهرنۍ سوداګرۍ پوهنتون د ملي ورخلاصون څېړنيز انسټيټيوټ پروفيسور جواګ روی وايي، چې د يانګ ځه سيند اقتصادي سيمه د کرونا وبا پر وړاندې مبارزه کې بريالۍ شوه او د ځان جوړولو پیاوړی توان يې ښودلی دی. نوموړی همدارنګه وايي، چې د ټولنې د وضعيت په عادي کېدو سره صنعتي ځنځير هم په تدريجي توګه عادي حالت ته ګرځېدلی او د يانګ ځه سيند ډېلټا سيمې صادرات او واردات ښايي ګړندي او عادي شي او هم د هېواد د بهرنۍ سوداګرۍ پرمختګ ته قوي خوځنده ځواک ورکړي.
د بهرنۍ سوداګرۍ چټک پرمختګ له سوداګريزو همکارانو سره ښو اړيکو ته ترجیح ورکوي. د روان کال په لومړيو اوو مياشتو کې له اسيان، اروپايي ټولنې، امريکا او د کوريا جمهوريت سره د چين په صادراتو او وارداتو کې په پرله پسې توګه زياتوالی ښيي.
د سيمې د هراړخيزو اقتصادي همکاريزو اړيکو تړون(رسيپ) د روان کال په پيل کې نافذ شوی، چې د بهرنۍ سوداګرۍ د زیاتېدو سبب ګرځېدلی دی. د دې ترڅنګ ((د یو کمربند او یوې لارې)) پر غاړه له پرتو هېوادونو او د رسيپ له غړو هېوادونو سره د چين صادرات او واردات په جلاجلا توګه ٪ ۱۹.۸ او ٪ ۷.۵ زیاتوالی ښيي، چې د سيمې اقتصادي اتصال او د پانګونو همکارۍ يې پياوړې کړې او د سيمې د اقتصاد بيا سمسورتيا او پرمختګ ته يې انرژي ورکړې ده.
د روان کال له پيل راهيسې د چین د ګمرکاتو عمومي ادارې د رسيپ د اړوندو ګمرکي چارو او تګلارو د ورپېژندلو لپاره ډېر کارونه کړي ، څو تصدۍ په رښتيني توګه اړوندې امتيازي تګلارې درک کړي او ترې ګټې واخلي. د بېجينګ د ګمرکاتو ادارې چارواکې وانګ وې وايي، ادارې يې د دريو برخو ۱۴ مهمو پوښتنو ته د ځواب ورکولو په موخه اړوند سندونه چمتو کړي او پرلیکه خپرونو کې يې د بېجینګ ښار ۲۴۰۰ تصديو ته اړوند معلومات ورکړي دي.
د چين د چايناټېکس(CHINATEX) کمپنۍ عمومي مدير دوان تاو وايي، کمپنۍ يې د کرونا وبا د منفي اغېزو د مخنیوي په موخه د خپلو اقتصادي فعاليتونو د لګښت د کمولو په هڅه کې ده او له ګمرکي ادارې يې د رسيپ تصديقلیک ترلاسه کړی دی، چې له دې لارې يې جاپان ته د توليداتو د ګمرکي تعرفې له ٪ ۱۰ څخه ٪ ۸.۲ ته راټيټې شوې او يوازې د روان کال په لومړۍ نيمايي کې يې لګښت څه باندې سل زره يوان سپمول شوي دي.
د روان کال په لومړيو اوو مياشتو کې د چين د هغو تصديو شمېر چې د وارداتو او صادراتو په ارزښت کې يې مثبت زياتوالی راغلی، د تېر کال د همدې مودې په پرتله ٪ ۵.۸ زياتوالی ښيي، چې له دې څخه د شخصي تصديو د وارداتو او صادراتو ارزښت ٪ ۱۵.۳ زياتوالی ښيي او د هېواد د بهرنۍ سوداګرۍ په عمومي ارزښت کې ٪ ۵۰ خپلوي.
د چين د بهرنۍ سوداګرۍ پوهنتون د ملي ورخلاصون څېړنيز انسټيټيوټ پروفيسور جواګ روی د شخصي تصديو ياد پرمختګونه ډېر د خوښې وړ بللي او لامل يې د حکومت اړوندو مرستندويه پاليسيو او د هېواد اصلاح شوي سوداګريز چاپېريال ته په ګوته کړی دی.
ښاغلي جوانګ دا هم منلې، چې نړيوال اقتصادي وضعيت لاهم پېچلی ښکاري، خو د چين اقتصاد ډېر پټ قوتلري او د مثبت پرمختګ تمایل يې هم نه دی بدل شوی، نوموړی باوري دی، چې د حکومت د يو لړ اقتصادي اقداماتو او تګلارو په عملي کېدو سره به د هېواد اقتصادي فعاليتونه په منظمه توګه عادي شي او بهرنۍ سوداګرۍ به په پرله پسې توګه ثابت پرمختګ وساتي.
