د چين د دولت رئيس شي جين پينګ د نومبر په ۵مه نېټه د چين شپږم نړيوال وارداتي نندارتون ته پيغام ولېږه او د دغه نندارتون د راتلونکي پرمختګ په اړه يې هيله وښودله، چې دغه نندارتون به د نوي پرمختګ مزل په ابادۍ کې د کړکۍ رول پياوړی کړي، د لوړې کچې د ورخلاصون په هڅولو کې به د ډګر رول په ښه توګه ولوبوي او نړۍ ته به د نړيوالو توليداتو د برابرولو لاښه خدمتونه وکړي.
په چين کې د امريکايي تصدۍ جانسن انډ جانسن (Johnson &Johnson) مسؤل سونګ وې چون د رئيس شي د پيغام له لوستلو وروسته وويل، چې (( موږ د لوړې کچې ورخلاصون د ټينګښت په اړه د چين ټينګ هوډ او د نړۍ د اقتصادي پرمختګ او سوداګريزو همکاريو د هڅولو لپاره د چين د مسئوليت احساس او کړنې ليدلې دي. ))
په شمالي اسيا کې د فرانسوي تصدۍ اوريال (L’ORÉAL) مشر او په چين کې د دغې تصدۍ اجرائيوي مشر فيبري خبريال ته وويل، چې د چين نړيوال وارداتي نندارتون زموږ لپاره بازارونو ته د لا زياتو نويو برنډونو د ورپېژندنې ښه فرصت دی. په تېرو پنځو کلونو کې زموږ د تصدۍ له لسو زيات نوي برنډونه د چين بازارونو ته داخل شوي، چې دا په چين کې زموږ د تصدۍ د برياليتوب يو مهم لامل بلل کېږي.
له ۲۰۱۸م کال راهيسې د چين د پنځو دورو نړيوال وارداتي نندارتونونه په برياليتوب تر سره شوي او پکې د لاسليک شويو تړونونو عمومي ارزښت ۳۵۰ ميليارډو امريکايي ډالرو ته نژدې شوی دی.
روان کال په چين کې د اصلاحاتو او ورخلاصون تګلارې د تطبيق له ۴۵مې کليزې او د کمربند او لارې د ګډې ابادۍ له لسمې کليزې سره برابر دی. په همدغه ځانګړي وخت کې د چين شپږم نړيوال وارداتي نندارتون د ټاکلې اجنډا له مخې د نومبر په ۵مه نېټه پرانيستل شوی. دغه نندارتون به د چين او نړۍ د همکاريو د پياوړتيا او باکيفيته پرمختګ په هڅولو کې څه رول ولري؟
چين په روان نړيوال وارداتي نندارتون کې د وارداتو د زياتوالي، د هېواد او د ازادې سوداګرۍ د ازمايښتي سيمو لپاره د خدماتي چارو د نړيوالې سوداګرۍ د منفي لېستونو د تطبيق او د ازادې سوداګرۍ د ازمايښتي سيمو د ابادۍ، په های نان کې د ازادې سوداګرۍ بندر په شمول يو لړ تدبيرونه اعلان کړي دي. دغه اقدامات به په چين کې د نړيوالو تصديو د پرمختګ لپاره نورې زياتې اسانتياوې برابرې کړي او دا ښيي، چې د چين نړيوال وارداتي نندارتون د لوړې کچې د ورخلاصون په هڅولو کې د ډګر رول ښه لوبوي. د سينګاپور د صنعت او سوداګرۍ ټولنې اجرائيوي مشر ګوه بينګ شیون وويل، چې (( موږ د بازار د ورخلاصون د پياوړتيا په برخه کې د چين د هڅو او کړنو په مناسبت ډېر خوشاله يو. د اوسني نړيوال اقتصادي وضعيت پر وړاندې، د چين دغه تدبيرونه ډېر ارزښتناک او مهم دي. ))
د چين د شپږم نړيوال وارداتي نندارتون له ۷۲ برخه والو څخه ۶۴ هېوادونه د کمربند او لارې د ګډې ابادۍ ګډون کوونکي هېوادونه دي. د تصديو په نندارتون کې له ۳۴۰۰ زياتو نړيوالو تصديو څخه څه باندې ۱۵۰۰ تصدۍ د کمربند او لارې د ګډې ابادۍ له ګډون کوونکو هېوادونو څخه راغلي. په نندارتون کې سوداګريز تړونونه به د اړوندو هېوادونو خلکو ته د ژوند د ښه والي فرصتونه ورسوي. د چين له شپږم نړيوال وارداتي نندارتون څخه خبر اخيستل شوی، چې چين به په شانګهای کې د ورېښمو لارې د الکترونيکې سوداګرۍ د همکاريو ازمايښتي سيمه جوړه کړي.
د چين د مالونو د سوداګرۍ اندازه او د خدماتي چارو د وارداتو او صادراتو اندازه به په راتلونکو پنځو کلونو کې په جلا جلا توګه له ۳۲ زرو مليارډو او ۵ زرو مليارډو امريکايي ډالرو څخه اوښتې وي. د چين نړيوال وارداتي نندارتون په نړۍ کې د دولت په کچه لومړی وارداتي نندارتون بلل کېږي او په پر له پسې توګه به نړۍ ته د چين د ورخلاصون ګټې او فرصتونه ورسوي او د نړيوالو تصديو لپاره به د چين په بازار کې د کاروبار د پرمختګ زمينه برابره کړي. د چين لوی بازار به د نړۍ لپاره د ګټو د شريکولو رول ته دوام ورکړي او د چين او نورو هېوادونو ګډ برياليتوبونه به رامنځته کړي.
