د چين د کمونېست ګوند د مرکزي کمېټې د سياسي بيورو دايمي غړي او صدراعظم لي چيانګ د اکتوبر په نهمه د کوریا ډيموکراټيک ولسي جمهوريت په پلازمېنه پيونګيانګ کې د دغه هېواد د کارګرو ګوند له عمومي منشي او د دولتي شورا له مشر کيم جونګ اون سره وکتل.
لي چيانګ په دې کتنه کې وويل، په ښه توګه د چين او ډيموکراټيکې کوريا ترمنځ د دوديزو او دوستانه همکاریزو اړيکو ساتل، ټينګول او پرمخبیول د چين ټينګه پاليسي ده. ده زیاته کړه چې چین غواړي له ډيموکراټيکې کوريا سره د لوړپوړيو چارواکو ترمنځ تګ راتګ او سټراټېژيکې خبرې پياوړې کړي، خپلمنځي دوديزه دوستي وساتي، عملي همکارۍ ژورې کړي، په نړيوالو او سيمه ييزو چارو کې نږدې همغږي او همکاري وکړي، څواړخيزې همکارۍ تقويه کړي، د څواړخيزم پر ساتلو ټینګار وکړي ، عملي يې کړي او نړيوال نظم لاعادلانه او معقول لوري ته يوسي.
کيم جونګ اون په دې کتنه کې وويل، هېواد به يې په هر ډول نړیوال وضعیت کې له چين سره د دوستانه همکاريزو اړیکو دوام ته ژمن وي. هغه زیاته کړه، چې هېواد يې د يوه چين پېژندنې پر اصل ټينګار لري او غواړي چې له چين سره د لوړپوړيو چارواکو ترمنځ تګ راتګ او په بېلابېلو برخو کې خپلمنځي همکارۍ زياتې کړي، څواړخيزه همغږي تقويه ، خپلو سوسياليستي چارو ته وده ورکړي او د دواړو هېوادونو خلکو ته زياتې ګټې ورسوي.
