د افغانستان ا.ا د ریاست الوزرا سیاسي مرستیال مولوي عبدالکبیر د هېواد د اهل هنود او سیکانو شورا له استازو سره لیدلي دي. مولوي عبدالکبیر په یاده لیدنه کې افغانستان د ټولو افغانانو ګډ کور بللی دی او زیاته کړې یې ده چې ټول هغه اقوام چې په دې هېواد کې ژوند کوي په امنیت کې د ژوند کولو او د دې هېواد په ابادۍ کې د برخې اخیستلو حق لري. نوموړي زیاته کړې ده چې ټول افغانان باید د یو بل ترڅنګ په درېدو او د یو او بل په همکارۍ د هېواد د ابادۍ او ښېرازۍ لپاره کار او هلې ځلې وکړي. د یادونې ده چې د تېر نظام په وروستیو کې پر هندو او سیک افغانانو باندې تر څو خونړیو بریدونو وروسته ډېری سیکانو له افغانستان څخه د وتلو لار ونیوه او له هېواده بهر کډوال شول.
