شي جين پينګ د بنګلاديش د انتقالي حکومت له لوی سلاکار محمد يونس سره وکتل
د چين د دولت رئيس شي جين پينګ د مارچ د ۲۸مې نېټې په سهار په بېجينګ کې د خلکو په لوی تالار کې د بنګلاديش د انتقالي حکومت له لوی سلاکار محمد يونس سره وکتل.
شي جين پينګ په دغه کتنه کې وويل، چې د چين او بنګلاديش د خلکو ترمنځ دوستي پېړۍ پېړۍ تاريخ لري او د ورېښمو لرغونې لارې دواړه هېوادونه سره تړلي دي. دواړو هېوادونو د خپلمنځي رسمي اړيکو له ټينګېدو وروسته پر متقابل ملاتړ، برابر سلوک او همکارۍ ټينګار کړی دی.
شي جين پينګ زياته کړه، چې دواړه هېوادونه بايد متقابل سياسي باور لا پياوړی کړي او د مرکزي ګټو او مهمو پاملرنو په اړوندو چارو کې دې يو د بل ملاتړ وکړي.
دغه راز ده وويل، چې چين غواړي له بنګلاديش سره د کمربند او لارې د ګډې ابادۍ چارو ته پرمختګ ورکړي، د ډيجيټلي اقتصاد، زرغون اقتصاد، سمندري اقتصاد، د زيربناوو د ابادۍ او د اوبو لګولو په برخو کې همکارۍ زياتې کړي او کلتوري تبادلې او د خلکو ترمنځ اړيکې پياوړې کړي.
يونس وويل، چې چين د بنګلاديش د باور وړ ملګری دی او بنګلاديش د يو چين پېژندنې پر اصل ټينګار لري او د تايوان له بېلتون پالنې سره ټينګ مخالفت کوي. نوموړي زیاته کړه چې بنګلاديش غواړي د دواړو هېوادونو ترمنځ د رسمي اړيکو د ټينګېدو ۵۰مې کليزې په رڼا کې له چين سره د هراړخيزې ستراتيژيکې همکارۍ اړيکې پياوړې کړي.
