د چین دولت رئیس شي جین پینګ د جولای د ۱۶مې نېټې په ماسپښین په شانګهای کې د قزاقستان له ولسمشر کاسیم جومارټ توکایف سره، چې د مصنوعي ځیرکتیا په سږنۍ نړیواله غونډه او د مصنوعي ځیرکتیا د نړیوالې ادارې په لوړپوړې غونډه کې د ګډون لپاره چین ته تللی دی، ولیدل.
شي جین پینګ وویل، د نړۍ سل کلن بدلون په پېچلۍ او ژوره توګه روان دی، د چین او قزاقستان اړیکې له ډېرو ستونزو سره سره ثابتې ساتل شوې. د دواړو لوریو دایمي او هراړخیزې ستراتیژیکې اړیکې په لوړه کچه ټینګې شوې او له دې څخه د دواړو لوریو د همکارۍ ستر بالقوه ځواک او د پرمختګ ستره فضا ښکاري. چین او قزاقستان باید د انکشافي ستراتيژۍ او تګلارو تبادلې زیاتې کړي، د اغېزمنې همکارۍ سویه دې پرله پسې لوړه کړي تر څو په خپلمنځي ستراتيژیکو همکاریو کې نوي ګامونه پورته او نوې لاسته راوړنې ترلاسه شي.
ښاغلي توکایف په شانګهای کې د مصنوعي ځیرکتیا په نړیواله غونډه کې د ګډون له امله خوشحالي په ډاګه کړه. هغه د چین کمونېست ګوند د جوړېدو د ۱۰۵مې کلیزې او د رئیس شي جین پینګ تر مشرۍ لاندې د چین د پام وړ بریالیتوبونو په مناسبت توده مبارکي وویله.
هغه په ټینګار ویلي، قزاقستان له چین سره اړیکې د خپلو دیپلوماتیکو اړیکو تمرکز بولي او له چین سره د دایمي او هراړخیزو ستراتیژیکو اړیکو د ټینګښت لپاره په کوښښونو بوخت دی. قزاقستان غواړي له چین سره د مصنوعي ځیرکتیا د نړیوال مدیریت په برخه کې فعالې همکارۍ وکړي او د ګردې نړۍ د دوامدار پرمختګ، سولې او ثبات د هڅونې لپاره په ګډه زیارونه وباسي.
