عبدالله: له طالبانو سره په خبرو کې به د بحث لومړی ټکی اوربند وي

د مصالحې عالي شورا رییس عبدالله عبدالله له العربیه ټلویزیون سره په یوه ځانګړې مرکه کې ویلي، چې د سولې خبرو پيلېدو پر وړاندې وروستی خنډ چې د بندیانو خلاصون وو لرې شوی دی. عبدالله وايي د بین الافغاني مذاکراتو مهم ټکی به اوربند وي. نوموړی وايي، ممکن بین الافغاني مذاکرات پيچلي پړاونه ولري او ممکن په څو مرحلو کې تر سره شي. هغه وايي د قطر تر څنګ ځینو نورو هېوادونو هم د بین الافغاني خبرو د پیل لپاره چمتووالی ښودلی، خو د اوس لپاره قطر هېواد غوره شوی دی. عبدالله وايي له طالبانو سره په خبرو کې د جمهوریت ارزښتونو او د تېرو ۱۸ کلونو لاسته راوړنو څخه دفاع کوي، چې په همدې تړاو یې، مرکچي ټیم ته هم لازمه لار ښوونه کړې ده. نوموړي د سولې په پروسه کې د ځینو نورو هېوادونو په ګډون د پاکستان په رول ټینګار وکړ خو دا یې وویل چې پاکستان دې له خپل نفوذ څخه په استفادې چې په طالبانو یې لري دا ډله سولې ته وهڅوي.