عزیزي: د کابل او آستانې ترمنځ د سوداګرۍ کچې لوړېدو هڅه کوو

د صنعت او سوداګرۍ وزارت چارواکي وایي، هڅه کیږي چې د کابل او آستانې ترمنځ د سوداګرۍ کچه لوړه شي. د صنعت او سوداګرۍ سرپرست وزیر د افغانستان او قزاقستان په سوداګریزې مجمع او د افغان- قزاق نندارتون په پرانېستې مراسمو کې د دغو دواړو هېوادونو د سوداګریزو اړیکو پر پیاوړتیا ټینګار وکړ. نورالدین عزیزي زیاته کړه، د سوداګریزو چارو د پراختیا لپاره هڅې کوي چې، د دغو دواړو هېوادونو تر منځ هوايي دهلیز فعال شي او همداراز سوداګرو ته د ویزې ورکړې بهیر هم اسانه شي. نوموړي همداراز د دواړو هېوادونو د خصوصي سکټورونو تر منځ د څو هوکړو له لاسلیک کېدو هم خبر ورکړ. له دې سره سم، د هېواد بهرنیو چارو وزارت هم وايي، په هېواد کې د پانګونو لپاره فرصتونه برابر شوي او په وینا یې قزاقستاني پانګوال کولی شي د افغانستان په بېلابېلو برخو کې پانګونې وکړي. په افغان- قزاق نندارتون کې یو شمېر ګډونوال افغان سوداګر وايي، په بهرنیو نندارتونونو کې په ګډون سره کولی شي خپلو صادراتي توکو ته ښه بازار موندنه وکړي. په دې نندارتون کې څه باندې ۳۵۰ سوداګرو ګډون کړی او د اګست تر پنځمې به د خلکو پر مخ پرانېستی وي.