لغمان کې د کچالو حاصلات ۷ سلنه زیات شوي

د لغمان د کرنې ریاست مسوولین وایي، چې سږکال په دغه ولایت کې د کچالو په حاصلاتو کې ۷ سلنه زیاتوالی راغلی او بازار یې هم د تېرو کلونو په پرتله ښه شوی دی. د مسوولینو په خبره سږکال په لغمان کې ټولټال ۲۶ زره ۸۶۷ ټنه د کچالو حاصلات راټول شوي دي. د مالوماتو له مخې تېر کال له دغه ولایت څخه ۲۵ زره ۱۱۰ ټنه کچالو راټول شوي وو، چې د سږ کال په پرتله ۷ سلنه زیاتوالی ښيي. د لغمان د کرنې ریاست مسوولین وایي، چې بزګرانو ته مسلکي سلا مشورې، د اصلاح شویو تخمونو کارول، موسمي بارانونه، د ناروغیو پر وړاندې پر وخت مبارزه او مناسب اقلیم هغه مهم عوامل دي چې د کچالو د حاصلاتو د زیاتوالي لامل شوي دي.