د پاکستان لومړي وزير محمد شهباز شريف د يو لوی سوداګريز پلاوي په مشرۍ د جون په ۵مې نېټې چين ته په خپل پنځه ورځني سفر پيل کړی دی. دا په مارچ کې تر واکمنېدو وروسته چين ته د ده دوهم سفر دی چې د عملي اقتصادي همکاريو ژورول به د کاري اجنډا مهمه برخه ده.
پر بيجينګ سربېره چې د پاکستان لومړی وزير او د چين رهبري به پکې د دواړو هېوادونو دوديزه دوستي تازه کړي، شهباز او د هغه په مشرۍ اقتصادي پلاوی به د چين په شمال لويديځ او سويل کې د سيمه ييزې اقتصادي ودې دوو موتورونو شي ان او شن جن ته هم ولاړ شي څو د همکاريو لپاره نوي فرصتونه ولټوي.
لوړ انفلاسيون او بېکارۍ د پاکستان پر اقتصاد د پام وړ نزولي فشار اچولی دی. همدا مهم دليل دی چې د شهباز حکومت د چين – پاکستان اقتصادي دهليز يا CPEC (سيپيک ) وړولو ته د پام وړ اهميت ورکوي.
سيپيک د کمربند او لارې وړانديز اړوند پروګرام دی چې په ۲۰۱۵ کال کې یې له پيلېدو راهيسې په پاکستان کې اقتصادي وده هڅولې او ځايي خلکو ته یې د پام وړ ګټه رسولې ده. د راپورونو پر بنسټ دواړه لوري هڅه کوي چې د صنعت، انرژۍ، تکنالوژۍ، نوښتونو، او زرغون اقتصاد د تقويه کولو او د پاکستاني مارکيټ د پرانيستلو له لارې سيپيک لوړې کچې ته ورسوي څو په راتلونکې لسيزه کې د پاکستان د ټولنيز او اقتصادي انکشاف لپاره باثباته انګيزه رامنځته شي.
دواړو لورو هېله څرګنده کړې چې د شهباز سفر به د سيپيک د لومړۍ برخې پر پایلو په تکیې سره دويمې برخې ته د يوه پاخه بنسټ له اېښودو سره مرسته وکړي چې تمه کيږي دواړو هېوادونو ته به لا ډير اقتصادي منفعت ورسوي. د دې پروسې په لړ کې دواړه لوري بايد لا ډيرې پاکستاني کمپنۍ له چيني شرکتونو سره همکارۍ ته او لا ډير چينايي شرکتونه د سويلي اسيا په دغه هېواد کې پانګونې ته وهڅوي.
د پاکستان د سوداګريز پلاوي غړي د کرنې، کانونو، انرژۍ او معلوماتي ټکنالوژۍ د برخو د ۷۹ شرکتونو استازي دي. دا ښيي چې پاکستان په دې برخو کې له چين سره د همکاريو د پياوړي کولو په لټه کې دي. فضايي مسايل، ساينس او ټکنالوژي، زده کړې، کلتور او ولسي تبادلې د راپورونو پر بنسټ هغه نور سکټورونه دي چې د شهباز شريف حکومت پکې د بالقوه وړتيا په لرلو سره له چين سره د همکاريو د پراخولو هيله لري.
پاکستان بايد د همکاريو د لا ډيرې پراختيا لپاره د پانګونې معقول سياستونه تدوين او اړين اصلاحات رامنځته کړي څو د هغه هېواد سوداګريز چاپېريال تقويه او چيني پانګوال په پاکستان کې پانګونې ته زړه ښه کړي. په ورته مهال اسلام اباد بايد د هغو چيني وګړو د خونديتوب لپاره پاخه اقدامات وکړي چې په پاکستان کې کار او ژوند کوي.
د ترهګرۍ ضد دوه اړخيزو همکاريو د پياوړي کولو څرنګوالی په احتمالي ډول سره له بيجينګ څخه د شهباز شريف د کتنې محوري ټکی و. چين ته د شريف له سفر لږ مخکې يوولس وسله وال چې د مارچ په ۲۶مه نېټه د خيبر پښتونخوا په داسو سيمه کې پر چيني وګړو مرګوني ځانمرګي بريد کې ښکېل وو، ونيول شول. په هغه بريد کې پنځه چيني انجنيران او د هغوی پاکستانی موټر چلوونکی وژل شوي وو. تمه کيږي چې پاکستاني نظاميان به په راتلونکو څو مياشتو کې د وسله والو د ځپلو لپاره اقدامات وکړي څو د هغو چيني وګړو د امنيت د خونديتوب لپاره خپل عزم ثابت کړي چې په پاکستان کې کار او ژوند کوي.
دغه راز چين هم غواړي چې د ملګرو ملتونو او د شانګهای د همکاريو سازمان په کاري چوکاټونو کې د ترهګرۍ پرخلاف د مبارزې، د سيمه ييز وحدت د ټينګښت او د مخ پر ودې هېوادونو د مشروع حقونو د دفاع په برخو کې له پاکستان سره همکارۍ پراخې کړي.
تمه کېدای شي چې پاکستان د شهباز شريف په رهبرۍ کې د سياسي وحدت، ټولنيز ثبات، تر کنټرول لاندې امنيت او پايدارې پراختيا يوې نوې مرحلې ته ورسيږي. د شهباز سفر ښيي چې چين او پاکستان به له يوه او بل ملاتړ ته دوام ورکړي او لاس په لاس به د چين – پاکستان د هر فصل همکاريو ستراتيژيک مشارکت يوې نوې کچې ته ورسوي.
