ډېر زيات بهرنيان غواړي، د پسرلني اختر د راسېدو په درشل کې چين ته سفرونه وکړي.
شمېرې ښيي، د ۲۰۲۶م کال د پسرلني اختر د رارسېدو په درشل کې چین ته د هوايي پروازونو د پلورل شويو ټکټونو شمېر د تېر کال د همدې مودې په پرتله ۴ چنده زيات شوی، چې په دې جمله کې له اروپايي هېوادونو څخه چين ته د هوايي پروازونو د پلورل شويو ټکټونو شمېر دوه چنده زياتوالی ښيي.
پسرلنی اختر د چين تر ټولو لوی دوديز جشن دی، چې په وياړ یې په ټول هېواد کې یوه اونۍ رخصتي وي. پسرلنی اختر د ۲۰۲۴م کال په پای کې د ملګرو ملتونو د يونيسکو سازمان لخوا د بشر د غير مادي کلتوري ميراثونو په نوملړ کې هم شامل شوی، چې په دې سره دغه اختر په نړۍ کې ډېر شهرت موندلی دی.
ډېر بهرنيان غواړي، چې پسرلني اختر په چين کې تېر کړي او له چينايانو سره یې په ګډه ولمانځي.
چين په ۲۰۲۵م کال کې په يو اړخیز ډول د ۴۸ هېوادونو د اتباعو لپاره له وېزې پرته دغه هېواد ته د سفر اسانتياوې برابرې کړي او له ۲۹ هېوادونو سره يې له ويزې پرته د خلکو د متقابل تګ راتګ تګلاره پلې کړې ده. چين ته له ويزې پرته د بهرنيانو شمېر د ۲۰۲۴م کال په پرتله شاوخوا نيم چند زیات شوی دی.
د چين بېلا بېلې سيمې خپلې ځانګړتياوې لري.
په ژمي کې د چين شمال ختيځې سیمې پر واورو پوښل شوې وي او جنوبي سیمې يې بیا معتدله هوا لري او ډېر زیات غير مادي کلتوري ميراثونه لري.
د بېلا بېلو هېوادونو سيلانيان غواړي چې د پسرلني اختر په درشل کې د چين مختلفو ځايونو ته سفرونه وکړي او ځايي دودونه او کلتورونه یې تجربه کړي.
د دې تر څنګ، په بهر کې هم خلک د چين د پسرلني اختر خوشحاله فضا احساسولی شي.
د نړۍ شاوخوا ۲۰ هېوادونو کې د پسرلني اختر په لومړۍ ورځ رخصتي وي او يو شمېر هېوادونه بیا د همدغه اختر په وياړ ډول ډول فعاليتونه ترسره کوي.
د چيني کلتور هسپانوي کارپوهه اليسيا رېلينک الېتا په يوه ليکنه کې وايي، چې هسپانويان له چينايانو سره په ګډه پسرلنی اختر لمانځي او په خوښيو کې يې ګډون کوي. د هغې په خبره، په چين او نړۍ کې د پسرلني اختر د نمانځنې فعاليتونه کال په کال نوي کېږي او د تخنيکونو په رڼا کې رنګا رنګ کلتوري رڼاګانې پکې خپرېږي.
اوس د ډېرو هېوادونو خلک يوازې پسرلني اختر ته پاملرنه نه کوي، بلکې لمانځي يې او په فعالیتونو کې يې برخه اخلي.
پسرلنی اختر له تېر کال سره مخه ښه کوي او نوي کال ته ښه راغلاست وايي او دا د کورنيو د يو ځای کېدو لپاره د خوښۍ شېبه بلل کېږي. همدغو ټکو د بېلا بېلو هېوادونو د خلکو پاملرنه راجلب راکړې ده.
د اس کال پسرلنی اختر به ژر پيل شي. د بېلا بېلو هېوادونو خلک به په پسرلني اختر کې د چين کلتوري ښکلا احساس کړي او هم به خپلې کلتوري ځانګړتياوې له نورو سره شریکې کړي.
