په هېواد کې د جګړو له تودېدو سره هممهاله ملکي مرګ ژوبله هم ډېره شوې ده. تازه په کندهار کې د هوايي بریدونو له امله د یوې کورنۍ یوولس غړي وژل شوي، چې ښځې او ماشومان هم پکې دي. د کندهار په ارغنداب کې له څو ورځو راهیسې خونړۍ جګړه روانه ده چې له امله یې لسګونه ملکی وګړي د خپلو کورونو پرېښودو ته اړ شوي دي. تازه د افغان حکومت له لوري په شوو هوایي بریدونو کې ملکي تلفاتو ګڼ غبرګونونه پارولي دي.
د کندهار په ارغنداب او څو نورو ولسوالیو کې له څو ورځو راهیسې خونړۍ جګړې روانې دي. سره له دې چې د امریکا او طالبانو ترمنځ د شوې هوکړې له مخې، باید طالبان تاوتریخوالی کم کړي او پر افغان ځواکونو تهاجمي بریدونه ونه کړي، خو تازه دغې ډلې په ګڼو ولسوالیو کې پر افغان پوځ بریدونه کړي چې له امله یې نه یوازې افغان سرتېرو، بلکې ملکي وګړو ته هم مرګ ژوبله اوښتې ده. بلخوا افغان حکومت چې ځان په دفاعي حالت کې بولي، پر وسله والو طالبانو هوایي بریدونه کوي چې له امله یې ملکي وګړو ته مرګ ژوبله اوړي.
په وروستیو ورځو کې د هلمند په نادعلي، د کندهار په ارغنداب او ځینو نورو ولسوالیو کې افغان او بهرنیو هوایي ځواکونو بریدونه کړي چې له امله یې د طالبانو ترڅنګ ملکي وګړو ته هم درانه تلفات اوښتي دي. تر ټولو خونړۍ او بوږنوونکې پېښه یې وړمه شپه د کندهار په ارغنداب کې په یوه هوایي برید کې د ملکي وګړو وژل وو. د کندهار په ارغنداب کې ځایي خلک وایي چې وړمه شپه لس نیمې بجې شاوخوا د دوی پر کورونو ګڼ هوایي بریدونه شوي چې ملکي تلفات یې اړولي دي. په دې پېښه کې د یوې کورنۍ یوولس غړي وژل شوي چې ښځې او ماشومان هم پکې شامل دي. د وژل شوو نږدې خپلوان وايي چې په پېښه کې یې ورور له خپلو ماشومانو سره یوځای وژل شوی دی. ګل محمد وایي، پر کور یې درې ګولۍ لګېدلي دي، د کورنۍ یوولس غړي یې وژل شوي چې ښځې او ماشومان پکې دي. د ده په خبره: ((لس نیمې بجې به وې، لومړی درب شو، چې ومې کتل ورور مې تر خاورو لاندې و، په دویم درب کې مې د ورور ماشومان ووژل شول او بیا تر سهاره همداسې ډزې او بریدونه وو، مړي تر خاورو لاندې وو، نو را ایستلی مو نه شوی، سهار مو په بېلچو مړي را وایستل)).
د ارغنداب ولسوالۍ بل اوسېدونکی عبدالصمد وايي چې په پېښه کې ټول ملکي وګړي وژل شوي دي. د ده په وینا، په سیمه کې هېڅ راز جګړه او نښته نه وه، ټول ویده وو او ناڅاپه الوتکو دوره وکړه چې له دویمې دورې سره یې بریدونه هم وکړل.
بلخوا د ملي امنیت ۰۳ قطعې مطبوعاتي مسوولینو بیا ویلي چې دوی د ارغنداب په بېلو سیمو کې د وسله والو طالبانو پټنځایونه او ځالې په نښه کړي او په هغه کې یې د اوو ځانمرګو بریدګرو په ګډون، ګڼو وسله والو طالبانو ته مرګ ژوبله اړولې ده. د دوی په خبره، په پېښه کې ملکي وګړي نه دي وژل شوي.
خو ملي دفاع وزارت بیا وایي چې دوی په پېښه کې د ملکي وګړو د وژل کېدو ادعاوې څېړي. د یاد وزارت په وینا، افغان ځواکونو د ارغنداب په بېلو سیمو کې د طالبانو پر ضد عملیات ترسره کړي، خو دا چې د ملکي مرګ ژوبلې ادعا کېږي، په اړه به یې معلومات وروسته له رسنیو سره شریک کړي. دوی د یوه ګډ پلاوي د ټاکل کېدو خبره هم کوي.
د افغان ولسمشر مرستیال ویاند دواخان مینه پال بیا وایي، طالبان د خلکو په کورونو کې پنا اخلي او له دې سیمو د سپر په څېر ګټه پورته کوي، نو ځکه دوی اړ دي چې د خپلو خلکو دفاع وکړي. هغه په دې پېښه کې طالبان پړه بولي. طالبانو هم په دې راپورونو غبرګون ښودلی او ویلي یې دي چې د افغان پوځ په هوایي بریدونو کې ملکي وګړي وژل شوي دي.
