هیګسېټ: واشنګټن له ایران سره د جګړې په لټه نه دی

د امریکا دفاع وزیر پېټ هیګسېټ، وایي واشنګټن له ایران سره د جګړې په لټه نه دی، خو د امریکا موخه د هغه څه پای ته رسول دي چې نوموړي «پر هرمز تنګی د ایران ناقانونه کنټرول» بللی دی. الجزیرې راپور ورکړی چې هیګسېټ دا څرګندونې په یوې خبري غونډه کې کړې دي. نوموړي زیاته کړې، د امریکا پوځ د «ازادۍ پروژې» په نوم عملیاتو په چوکاټ کې هڅه کوي، څو په سیمه کې د «ایران تهاجمي اقداماتو» پر وړاندې د بېړیو امنیت ډاډمن کړي. هیګسېټ ټینګار کړی چې د هرمز تنګي د پرانېستلو لپاره به امریکایي ځواکونه د ایران هوايي حریم یا سمندري اوبو ته د ننوتلو اړتیا ونه لري. هغه همداراز ویلي: «موږ د جګړې په لټه نه یو» او پر هرمز تنګي د ایران د بشپړ کنټرول ادعا یې رد کړې ده.