چين په تېره جولای مياشت کې د کمونېست ګوند د شلمې مرکزي کمېټې په درېيمه عمومي غونډه کې تر ۳۰۰ ډير اصلاحي اقدامات اعلان کړل چې د بازار محوره، قانون بنسټي او نړيوالې کچې سوداګريز چاپېريال د رامنځته کولو لپاره د دغه هېواد اراده څرګندوي.
له دې سره سره هم ځينې لويديځ نيوکګر هڅه کوي چې د چين اصلاحات بې اعتباره کړي او وايي، اسمان چې څومره تنيږي، هومره باران نه کيږي. دغه ډول ذهنيت د چين او لويديځ تر منځ د اصلاحاتو د فلسفې ژور توپير ښيي.
له لسيزو راهيسې، د متحدو ايالتونو په رهبرۍ لويديځ هېوادونه پر چين فشار ور ولي چې ليبرال اقتصادي سيسټم ته مخه کړي. د ځينو لويديځوالو کتونکو په نظر يوازې هغه اصلاحات ګټور ګڼل کيږي چې چين پر يوه کپيټلېسټ هېواد بدل کړي.
د چين د اصلاحاتو ستراتيژي روښانه مسير او لارښودونکي اصول دي. د چين د ولسي جمهوريت رييس شي جين پينګ په ځلونو ويلي چې «موږ بايد د لومړۍ او وروستۍ موخې په توګه د ګوند ټوليزې رهبرۍ، د چيني خصوصيت لرونکي مارکسېزم او سوسالېزم، د خلکو ډيموکراټيکې دیکتاتورۍ چې ټولنیز عدالت ته پکې لومړيتوب ورکول کيږي، عدالت او ولسي خيرښېګڼې ته ادامه ورکړو».
دغه ليدلوري په دې مانا دی چې د لويديځو هېوادونو پر خلاف چې ښايي د ولسي خير ښېګڼې په بيه چټکو اصلاحاتو ته مخه کړي، چين غواړي چې خپل کورني وضعيت ته په کتو، تدريجي اصلاحات راولي. دا چاره د اقتصادي ودې او ټولنيز ثبات تر منځ انډول برابروي او تر بېړني بدلون وړاندې په احتياط سره د پلانونو جوړول شوني کوي.
د دغه ډول اصلاحاتو اغېزناکتوب بايد د حقيقي پايلو له مخې و ارزول شي. د چين د وروستيو اصلاحاتو مقياس او پايلې له تاريخي پلوه بې ساري دي او له دې کبله بايد ترې انکار ونه شي چې ګني د لويديځوالو له توقعاتو سره برابر نه دي.
د اصلاحاتو وروستۍ لړۍ سيستماتيکې، ميکانيزمي او بنسټي برخې په نښه کړې دي. د بېلګې په ډول په تېره جولای مياشت کې چين ژمنه وکړه چې خپل کورني وضعيت ته په کتو سره به د نوي، باکيفيته توليدي ځواک د پياوړي کولو لپاره ادارې او ميکانيزمونه ښه کړي، حقيقي او ډيجيټلي اقتصادونه به سره مدغم کړي، د خدماتو سکټور ته به پراختيا ورکړي، زيربناوې به عصري کړي او د اکمالاتي ځنځير او صنايعو امنيت او مقاومت به پياوړي کړي.
د سينهوا خبري اژانس د راپور پر بنسټ، چين تر دې مهاله نږدې ۱۰ زره ډيجيټلي ورکشاپونه او ځيرکې فابريکې جوړې کړې دي او د صنعتي انټرنيټي چوکاټونو شمېر یې ۵۰ ته رسېدلی دی.
دغه هېواد، همدا راز په معلوماتي ټکنالوژۍ، پرمختللو تجهيزاتو، نویو موادو او انرژۍ کې ۴۵ ميلي پرمختللي کلسټرونه رامنځته کړي دي. د جيانګ سو ولايت په چانګ ژو کې د بېټريو د توليد لپاره د اړتيا وړ ۹۷ سلنه توکي موندل کيږي.
د احصائيې د ملي بيورو د معلوماتو له مخې، د چين د پرمختللې ټکنالوژۍ توليدي سکټور د ۲۰۲۴م کال په لومړۍ نيمايي کې ۷/۸ سلنه کلنۍ وده کړې وه چې د چين د توليدي سکټور د ټولو توليداتو په پرتله ۲.۷ سلنه ډيروالی ښيي. د روان کال په لومړۍ نيمايي کې د چين د ۴۱ لويو صنايعو له ډلې ۳۹ هغو کلنۍ وده تجربه کړې چې له شک پرته دغه چټکه وده د چين د اصلاحاتو مستقيمه پايله ده.
ځينې لويديځوال غواړي چې د چين د اصلاحاتو د بهير د بدنامولو له لارې دغه هېواد ته د بهرنۍ پانګې د ورتګ مخه ونيسي. پر دې سربېره، د چين د اقتصادي ودې او نړيوال موقف په لوړيدو سره، نړيوال رقابت له اقتصادي سياليو څخه په تدريجي ډول بنسټي سياليو ته اوښتی دی. له همدې کبله ډيری لويديځ متعصبين چې د لويديځ د اقتصادي سيسټمونو د برترۍ ساتنې په هڅه کې دي، د سوسياليستي هېوادونو له لوري اخيستل کېدونکي ټول اصلاحي ګامونه بې اغېزې بولي.
د لويديځ بدبينۍ ته له پام پرته د چين ودې د اصلاحاتو اهميت ثابت کړی دی.
