پر پولنډ شوي توغندوییز برید مرګ ژوبله اړوې ده

راپورنه وايي د اوکراین پولې ته څېرمه د پولنډ یوه کلي کې څو توغندي لګېدلي او مرګ ژوبله یې هم اړولې ده. اسوشیټډ پرېس خبري اژانس او پولنډي رسنیو روسیه د دغو راکټي بریدونو مسووله بللې خو د پولنډ او متحدانو لخوا یې د دغه تور رسمي تایید لا نه دی شوی. د روسیې دفاع وزارت بیا دا رپوټونه په لوی لاس د کړکېچ ډېرولو هڅه بللې ده. دغه وزارت په یوه خپره کړې خبر پاڼه کې ویلي، د دوی ځواکونو د اوکرایین او پولنډ پولې ته څېرمه پر اهدافو کوم برید نه دی کړی. په اعلامیه کې زیاته شوې، د توغندیو هغه ټوټې چې پولنډي رسنیو ښودلې، د روسي وسلو نه دي. له دې سره روسي رسنیو دا ادعا هم مطرح کړې چې ګوندې دا بریدونه اوکراییني ځواکونو کړي. ناټو، امریکا او یو شمېر نورو هېوادونو ویلي چې د دې پېښې د څرنګوالي د معلومولو په څېړنه بوخت دي. د پولنډ ملي امنیت شورا تر دغو راکټي بریدونو وروسته بېړنۍ غونډه کړې او پام کې ده وروسته یوه رسمي اعلامیه هم خپره کړي.