د چین او اسیان د بهرنیو چارو وزیرانو غونډه د جولای په ۲۲مې نېټې د فلیپین په پلازمېنې مانیلا کې ترسره شوه، چې پکې د اسیان د غړو هېوادونو خارجه وزیرانو او د اسیان سرمنشي هم ګډون کړی و.
دغه غونډه د چین د کمونېست ګوند د مرکزي کمېټې د سیاسي بیورو غړي او د بهرنیو چارو وزیر وانګ یي او د چین او اسیان د اړیکو همغږي کوونکي هېواد یعنې د مالیزیا د بهرنیو چارو وزیر محمد حسن په ګډې مشرۍ ترسره شوه.
روان کال د چین او اسیان د هراړخیزو ستراتیژیکو همکاریزو اړیکو د ټینګېدو له ۵مې کلیزې سره برابر دی.
وانګ یي غونډې ته په وينا کې ويلي، د چين او اسیان د مشرانو د ګډو ستراتیژیکو لارښوونو په رڼا کې، د دواړو خواوو ترمنځ همکارۍ باثباته او چټکې شوي او ښې پایله يې ترلاسه کړې دي.
د چين او اسیان همکاريو د دواړو خواوو شاوخوا ۲ ميليارډو خلکو ته ګټې رسولي او د چین او اسیان د ګډ برخلیک ټولنې د جوړولو لپاره يې ډېر پياوړی بنسټ برابر کړی دی.
نوموړي ويلي، د چین او اسیان د اړیکو پرمختګ د دې ښکارندويي کوي، چې متقابل درناوی او باور د ښه ګاونډیتوب بنسټ او اخلاص د ګډ ژوند لاره ده او د ګډو ګټو پر اساس همکارۍ د بریالیتوب بنسټ دی او خلاصون او ټولشمولیت بیا د سوکالۍ لپاره اړین دي او دا ټول یې د دوام ارزښتناکې تجربې بللې دي.
وانګ یي ويلي، چین په دې وروستیو کې د کمونېست ګوند د تاسیس ۱۰۵مه کلیزه ولمانځله.
د چين کمونېست ګوند په تېرو ۱۰۵ کلونو کې د څه باندې یو ميلیارډ او ۴۰۰ میلیونو چینایانو په مشرۍ په دوامداره مبارزه کې د پام وړ لاسته راوړنې لري، د بشري تمدن پرمختګ ته یې وده ورکړې او د نړۍ د پرمختګ منظره یې بدله کړې ده.
وانګ یي په خپلو خبرو کې د چین او اسیان د همکاريو لپاره ۴ وړاندیزونه کړي:
۱- چین او اسیان دې په سیمه کې د سولې او پرمختګ چاپېریال وساتي. دواړه لوري دې د جنوب ختیځې اسیا د هېوادونو د دوستۍ او همکارۍ تړون د لاسلیک د ۵۰مې کلیزې په درشل کې د سولې، همکارۍ، ور خلاصون او ټولشموله اسیايي ارزښتونو ته وده ورکړي او د نورو هېوادونو له غیر معقولو لاسوهنو سره دې ټينګ مخالفت وکړي.
۲- چین او اسیان دې د سیمه ییز پرمختګ انعطاف لوړ کړي. دواړه خواوې دې پر خلاصون او همکاري ټینګار ولري، د پرمختګ ادغام دې نور هم ژور کړي، د چین–اسیان د ازادې سوداګرۍ سیمې درېیم پړاو (CAFTA 3.0) دې جوړه کړي، په لوړ کیفیت دې د سیمه يیزو جامع اقتصادي همکاریزو اړیکو تړون پلی کړي او په سیمه کې د غلو دانو او انرژۍ امنیت او د اکمالاتي سلسلې ثبات دې پياوړی کړي.
۳- چین او اسیان دې د نوښت او زرغون پرمختګ ته وده ورکړي. دواړه لوري دې د ډیجیټلي اقتصاد، مصنوعي ځیرکتیا او سمندري کیبلونو په ګډون نویو برخو کې همکارۍ پراخې کړي، د اسیان د ډیجیټلي اقتصاد چوکاټي تړون د سمون چارې دې ګړندۍ کړي او د اقلیمي بدلون، پاکې انرژۍ او زرغون رنګ په شمول ځينو برخو کې دې همکارۍ چټکې کړي.
۴- چین او اسیان دې د خلکو په مرکزیت جامع او مساوي پرمختګ ته وده ورکړي او ډاډ دې ترلاسه کړي، چې خپلمنځي همکارۍ يې د ټولو هېوادونو د خلکو لپاره ګټورې دي.
وانګ يي زیاته کړې، چین به له اسیان سره د غربت کمولو، عامه روغتیا او تعلیم په شمول بېلا بېلو برخو کې نظر تبادلې او همکارۍ پیاوړې کړي.
نوموړي په خپلو خبرو کې یو ځل بیا د چین د جنوبي سمندرګي مسئلې په اړه د بېجينګ دريځ بیان کړی او ويلي يې دي، چې د چین جنوبي سمندرګی د ټولو ګډ کور دی او په خبره يې، چین او اسیان هېوادونه دا هوښیارتیا او توان لري، چې د چین د جنوبي سمندرګي مسئله سمه اداره کړي او د سیمې هېوادونه دې د چین د جنوبي سمندرګي د اړخونو د عملیاتو اعلامیه پلې کړي.
بېلا بېلو خواوو د اسیان او چین د هراړخیزو ستراتیژیکو همکاریزو اړیکو د ټينګېدو له ۵ کلونو راهیسې د ګټورو لاسته راوړنو ډېره ستاینه کړې او په متفقه توګه یې چین د اسیان یو ډېر مهم دوست ګاونډی او د خبرو همکار بللی دی او هم یې د ټول اسیان ترټولو لوی سوداګریز همکار ياد کړی دی.
دوی ویلي، د اسیان او چین اړیکې اغېزمنې پايلې او ستر حیاتي ځواک لري او د ټولو هېوادونو خلکو ته ګټې رسوي.
وانګ یي د غونډې په څنډه کې د اسیان هېوادونو له بهرنیو چارو وزیرانو سره هم لیدلي دي.
