بهرنيان د سږني پسرلني اختر په موده د سيل او د توکو د پېرودلو لپاره چین ته مخه کړې او یو نوی رجحان یې رامنځته کړی دی.
د روسیې يوې سیلانۍ داریا د پسرلني اختر په درشل کې د چین د جي لین ولایت هوی چون ښار ته ځانګړی سفر کړی او هلته يې د چين په لرغونو او دودیزو جامو کې عکسونه اخيستي دي. هغې دغه چاره د چین د دودیز پسرلني اختر د تجربه کولو لپاره غوره لاره بللې ده.
د چین د ګوانګ دونګ ولایت په فو شان ښار کې هم زیات شمېر بهرني سیلانیان تر سترګو کېږي او اکثره یې هلته په رسټورانټونو کې د پسرلني اختر ماښامنۍ ډوډۍ خوري.
د بهرنيو هېوادونو ګڼو سیلانيانو د سږني پسرلني اختر په درشل کې چين ته سفرونه کړي او غواړي د چين کلتور تجربه کړي.
د چین د کډوالو ملي ادارې په يوې وړاندوینې کې ويلي، چې د سږني پسرلني اختر د رخصتیو په جریان کې به د هېواد په بندرونو کې د مسافرو شمېر هره ورځ په منځنۍ توګه له ۰۵/۲ میلیونو څخه ډېر وي، چې دا د تېر کال د همدې مودې د ورته شمېر په پرتله ۱۴ اعشاریه ۱ سلنه زیاتوالی ښيي.
د سیلانیزو شرکتونو شمېرې ښيي، چې د پسرلني اختر په درشل کې چین ته د الوتکو د پلورل شويو ټکټونو شمېر د تېر کال د همدې مودې په پرتله شاوخوا ۴۰۰ سلنه لوړ شوی دی.
تر ټولو مهمه دا ده، چې ډېر بهرني سیلانیان يوازې له لیدنې څخه رضایت نه لري، بلکې دوی غواړي له هغو ” چینایي شیبو” څخه هم خوند واخلي چې اوسمهال يې پر ټولنیزو رسنیو ډېر شهرت موندلی دی. دغه راز دوی په چين کې د معبدي غونډو او د څراغونو نندارې په شمول رنګا رنګو فعاليتونو ته هم مخه کړې ده.
چين ته د بهرنیو سیلانیانو تګ مصرف زیات کړی دی. د چین د مالیې ملي ادارې په دې وروستيو کې يو لړ شمېرې خپرې کړي، چې له مخې يې په ۲۰۲۵م کال کې په چين کې د هغو بهرنیو مسافرو شمېر د ۲۰۲۴م کال په پرتله ۳۰۵ سلنه زیاتوالی موندلی، چې د پېرودل شويو سوداګريزو توکو د ماليو د تخفيف له امتيازي تګلارې څخه يې ګټې اخيستې دي. همدارنګه د دغو سوداګريزو توکو د خرڅلاو ارزښت او د مالیې د تخفيف ارزښت په جلا جلا توګه ۹۵ اعشاریه ۹ سلنه او ۹۵ اعشاریه ۸ سلنه زیات شوی دی.
ډېرو بهرنیو سیلانیانو رسنيو ته ويلي، چې د چین سمارټ محصولات بېلا بېل ډولونه لري او په لوړ کیفیت جوړ شوي دي.
د ویتنام يوې سیلانۍ لیانا رسنيو ته ویلي: « چین یوازې د نړۍ فابریکه نه ده، بلکې د نوښت سرچینه هم ده.»
کروشیايي سیلاني مارټین د بېجینګ د وانګ فو جینګ په سوداګریزه سیمه کې د ځيرک موټر د چلولو تجربه کړې او د چین د نوې انرژۍ موټرو ډیزاین او ټکنالوژیکي احساس یې حیرانونکی بللی دی. د نوموړي په وينا، که د چين د نوې انرژۍ موټر په اروپایي بازار کې وپلورل شي، نو هغه به یې پر پېردلو جدي فکر وکړي.
د چین ځلاند کولتور ډېر بهرني سیلانیان راجلب کړي او چين ته له ويزې پرته د تګ تګلارې هم د بهرنيو سیلانیانو لپاره اسانتیاوې برابرې کړې دي.
د چین د سوداګرۍ وزیر مرستیال شنګ چیو پينګ رسنيو ته ويلي، چې هېواد به یې هڅې وکړي چې د نړیوالو مصرف کونکو لپاره چين ته د تګ اسانتياوې برابرې او سفر يې اسانه کړي او د پېرودلو لپاره يې ارزانه او ښه توکي برابر کړي، څو دوی وکولی شي یو پرانیستی، ټولشموله، متنوع او نوښتګر چین تجربه کړي.
