پوتین: افغانستان کې؛ د امریکا د ۲۰ کلن حضور پایله مرګ او بربادي وه

د روسیې ولسمشر ولادیمیر پوتین په افغانستان کې د امریکا شل کلن حضور چې په دې وروستیو ورځو کې پای ته ورسېد، تر پوښتنې لاندې راوستی دی. د مسکو ټایمز د راپور له مخې، پوتین په خپله وروستۍ وینا کې ویلي چې امریکایي پوځیانو شل کاله په افغانستان کې بې ځایه هڅې وکړې او په دغه هېواد کې د امریکا شل کلن حضور له مرګ او بربادي پرته بله هیڅ نتیجه له ځان سره نه لرله. هغه څرګنده کړې چې دا مصیبت یوازې افغانانو ته نه بلکې هغوی کسانو ته هم رسېدلی دی چې په دغه هېواد کې یې په بې مانا جګړه کې قرباني ورکړې ده. پوتین چې په نړۍ کې د امریکا د سیاستونو تر ټولو سخت منتقد دی وایي، له بهر څخه پر یو هېواد د یو ارزښت تحمیلول ناشونی کار دی خو امریکا شل کاله پر غیر ممکن کارونو ټینګار وکړ چې بلاخره نتیجه یې خپله هم ولیده.