د چین د دولت رئیس شي جين پينګ د روان ۲۰۲۳م کال د مارچ په ۲۰مه نېټه په ځانګړې الوتکه کې مسکو ته ورسېد او روسیې ته يې رسمي سفر وکړ.
رئیس شي جین پينګ د مسکو په نړیوال هوايي ډګر کې کتبي وینا خپره کړه. هغه په خپلو خبرو کې وویل، چې غواړي له ولسمشر ولاديمیر پوتین سره د دوه اړخیزو اړیکو او د ګډې علاقې وړ مهمو نړیوالو او سیمه ییزو موضوعاتو په اړه د نظریو تبادلې وکړي او په نوې زمانه کې د دواړو خواوو د ستراتیژيکو او عملي همکاریو لپاره لارنقشه جوړه کړي.
شي جين پينګ د همدې ورځې تر دې مخکې د روسیې په رسنیو کې د یوې لیکنې په خپرولو سره دې ته اشاره وکړه، چې د چین او روسیې اړیکې د نړیوال وضعیت له بدلون او ازموینې څخه وتلې او د هېوادونو ترمنځ د اړیکو سمه لار يې پيدا کړې او په راتلونکې دوره کې د دواړو هېوادونو د اړیکو پرمختګ په اړه يې هیله وښودله.
دا د چین د دولت رئیس په توګه د شي جين پينګ تر بيا ټاکل کېدو وروسته لومړی سفر دی. د بهرنیو رسنیو په اند، له دې څخه ښکاري، چې چین په نوې زمانه کې له روسیې سره هراړخیزو ستراتيژيکو اړیکو ته جدي پاملرنه کوي. د چین او روسیې اړیکې لا ټينګې شوې دي، دا د نړۍ د سولې او ثبات د ساتلو لپاره ګټور اقدام دی.
د چین او روسیې مشرانو په دې وروستیو کلونو کې د نړیوال وضعیت له بدلون سره سره تل متقابلې تبادلې او تګ راتګ ساتلی. د دواړو هېوادونو مشرانو له ۲۰۱۳م کال راهیسې په دوه اړخیزو او نړیوالو صحنو کې ۴۰ ملاقاتونه ترسره کړل چې د دواړو خواوو اړیکو د سالم او ارام پرمختګ لپاره يې لارښوونې کړې دي.
د چین او روسیې د مشرانو تر لارښوونې لاندې، د دواړو خواوو متقابل سیاسي باور مخ په پياوړي کېدو او ژورېدو دی، عملي همکارۍ يې پر له پسې پراخې شوې دي، اغېزمنې نړیوالې همغږۍ يې ترسره کړې دي. د دواړو خواوو سوداګریز ارزښت تېر کال له ۱۹۰ میلیارډو ډالرو څخه زیات شوی او د ۲۰۱۲م کال په نسبت ۱۱۶ سلنه زیاتوالی ښيي. چین د مسلسلو ۱۳ کلونو لپاره د روسیې لومړی لوی سوداګر هېواد ګرځېدلی.
د روسیې علومو اکاډمۍ د نړیوال اقتصاد او نړیوالو اړیکو د څېړنیز انسټيټیوټ مرستیال مشر الکساندر لومانوف وویل، د رئیس شي جين پينګ په دغه سفر سره به په نوې زمانه کې د روسیې او چین اړیکې لا نورې هم ټينګې شي.
اوس نړیوال وضعیت ارام نه دی، ځينو لویو هېوادونو د خپل تسلط د ساتلو لپاره د لویو هېوادونو ترمنځ سیالي راپارولې، تقابل او اختلاف يې پېچلی کړی دی. چین او روسیې خپلواکې ډیپلوماتیکې تګلارې غوره کړې او د درېيمې خوا ضد، متحدې يا مقابلې اړيکې يې نه دي ټينګې کړې، د دوی ترمنځ همکارۍ هم د درېيمې خوا نفاق او منفي اغېزې نه شي زغملی. د دواړو خواوو اړیکې په پرمختګ کې نورې پخې او ټينګې شوې، د متقابل درناوي، په سوله کې د ګډ ژوند او د ګډو ګټو پر بنسټ د همکارۍ پر بنسټ د لویو هېوادونو نوي ډول نمونه يې جوړه کړې ده. ویل کېږي چې چین او روسیې د لویو هېوادونو د اړیکو سمه لار پيدا کړې او د پېچلي نړیوال وضعیت لپاره د الهام ارزښت لري.
چین او روسیه د ملګرو ملتونو د امنیت شورا دایمي غړي دي، دواړو خواوو په بېلا بېلو برخو کې خپلمنځي همکارۍ پياوړې کړې دي او د نړۍ د سولې او ثبات ساتنې لپاره يې مهم رول لوبولی دی.
باور دی چې روسیې ته د رئیس شي جين پينګ دغه سفر به په بریالیتوب سره ترسره کېږي، د دواړو خواوو اړیکو د سالم او ثابت پرمختګ به حیاتي ځواک برابر کړي او د دواړو هېوادونو خلکو ته به لا زیاتې ګټې ورسوي.
