ډبلیو ایف پي: افغان ماشومان د لوږې له ناورین سره مخامخ دي

په افغانستان کې د خوړو نړیوال پروګرام(ډبلیو ایف پي) استازياو مدیر جان ایلیف ویلي، چې په دغه هېواد کې ماشومان د لوږې له ناورین سره مخامخ دي او د دغه ناورین له امله ډېر فشار زغمي. ایلیف له سي‌جي‌ټي‌اېن سره په یوه مرکه کې ویلي چې روان کال ښايي له ۵ کالو کم عمره  شاوخوا ۳.۵ میلیونه ماشومان پر خوارځواکۍ اخته شي. هغه افغان ماشومان د لوږې ناورین «د لومړۍ کرښې قربانیان او اغېزمن» بللي دي. ایلیف زیاته کړې چې دا شمېر د تېر کال پرتله ۵۰۰ زره ډېر دی او د خوارځواکۍ بهیر مخ په بره روان دی.